Al-Hijr

Alif Lam Ra. Tsino ni tsinyaali tsieshitabu nende Ikuani yinoosinjia.

Aundi balitsa bekomba balia bakhaya mbu bamanyanga baba abasalaamu.

Baleshesa balie ebiakhulia mana basangaale, mana bakatibwe nende liparo lwobubeyi (mbu balileshelwa), ahambi ano betsa okhumanya.

Ne shikhwasishiakhwo olukongo lwosi lwosi tawe halali lwali nende ebise bialwo bimanyikhane.

Ne babulao abandu bosi bosi banyala okhwuranjilila ebise bieyindukho biabu, nohomba shibanyala okhushindibwa tawe.

Nebaboola mbu; “ Ewe ulia oweshilibwakhwo amestulisio, toto ewe oli omulalu”

“Shichila shina nolakhurerera abamalaika nikali mbu ewe oli mubaboolanga obwatoto?

Efwe shikhwishinjia abamalaika halali khubwatoto (ebise biokhusishibwa khwabu nibiula), ne awo shibalihebwa obwiyangu tawe (balisishibwa butswa.)

Toto efwe khweshia ametsulisio kano, ne khandi toto efwe nefwe khwitsa okhukaliinda.

Ne toto khwaruma Abarumwa mumikanda chia abandu beyimbeli.

Ne omurumwa yesiyesi shiyabetselanga halali bo bamukholelanga omubayo .

Ne endio nilwakhwinjisinjia mumioyo chia balia abamabi.

Shibasuubilanga kano tawe, ne bamala okhulola shingala kali khubandu bali imbeli wabu.

Ne khubafungulilanga omuliango kwo mwikulu mana baba nibaninanga.

Kho bakhaboolele mbu; “tsimoni tsiefu tsimeesibwe ne efwe abeene khulochelwe.”

Ne toto khwara mwikulu tsing’ining’ni, mana nikhutsirona khubalia bokhuhenga.

Na khwatsilinda okhurulana nende buli shetani owakhungwa.

halali ulia uwulilisinjia mukhwiba, naye mana, amulondangakhwo nende eshichenga shiomulilo shilolokha.

Ne liloba khwaliala mana nikhuramwo tsingulu ne nikhumesiamwo buli eshindu khushichelo.

Ne nikhubakasiliamwo obulamu, nende ebindi bia enywe mulabikabilanga tawe.

Ne shibulaho shiosi shiosi halali shirula khwifwe, nesikhushishinjia tawe halali khushichelo shimanyishe.

Ne khureranga omuyeka kwitsulemwo liime, ne khwishinjia amatsi okhurula mumaleesi ako. Mana khubanywesinjia amatsi ako. Ne shimuli enywe mukabikhanga tawe.

Ne ni efwe khulamusinjia ne ninefwe abafwisinjia, na ni efwe nefwe abalichelama. (abalikalusia).

Ne khwamanya abaranjililanga mwinywe, nekhumanyile abatong’a inyuma.

Ne toto Nyasaye wuwo niye wakhabakhung’asie toto ye niye owamachesi omumanyi muno.

Ne toto khwalonga omundu okhurula khwiloba eliumu, elirusinjia isauti(nilituywa) elirulana nende amatoyi karebwakhwo ifwani.

Ne amajiini khwakalonga imbeli awo, okhurulana nende omuyeka kwo mulilo.

Ne Nyasaye wuwo olwayaboolela malaika mbu; “Toto esie nditsa okhulonga omundu okhurula khuliloba liwumukhanga, lirulana nende amatoyi akarebwamwo ifwani.

Kho olwa ndalamala okhumuloonga mana nemufuramwo emiuya chianje, mumwinamile khulwa okhumuwa eshiribwa.

Abamalaika boosi halala nibamwinamila.

halali Ibilisi, yakhaya okhuba halala nende balia beenama.

(Nyasaye)Naboola mbu; “Ewe Ibilisi obele orie olabele halala nende abenaame?”

Naboola; “Shenyala okhwinamila omundu wawaloonga khuliloba eliumu lirusinjia isauti, elirula khu matoyi karebwakhwo ifwani tawe.”

(Nyasaye) Naboola mbu; “ rula omo, oli omutsube. “

Ne toto oli nende eshilaamo shianje okhula inyanga yeyindukho.”

Naboola mbu; “Nyasaye wanje omulesi ! Mbelesie obwiyangu okhula inyanga yabalilamusibwa.”

(Nyasaye) Naboola mbu; “toto ewe olimubalia bahebwa obwiyangu.

Okhula inyanga yebise bimanyishe biarebwaho .”

Naboola; “Nyasaye wanje! shingala wambusilia okhukora nditsa okhubaronela(abandu) khushialo ne nditsa okhubakosia boosi.”

halali abasuumba bobo Abatswenufu”

(Nyasaye) naboola mbu “ino ni injila yokhwitsa ewanje ilunjifu”

“Ne toto abandu banje ewe sholaba nende obunyali khubo tawe, halali balia abakori bakhulondakhwo.

Ne toto Jahannam niho habundu wabu, wabakasilibwa boosi.

ili nende emiliango saba, nebuli omuliango kuli nende ebuleka yakabulwa.

Toto balia baria Nyasaye baliba mumikunda nende tsisebele.

“Injilemwo mushironyo nomulembe”

Ne khulirusia amakhonye akali mubilifu biabu, ne baliba (shinga) abananda nibekhale khubisala biobwami nibahengana.

Shibulibatilakhwo obuchong’e bwosi bwosi omo tawe, ne shibalirusibwamwo tawe.

Boolela abasumba banje mbu esie nesie owobulesheli obunji owetsimbabaasi muno.

Ne eshinyasio shianje nisho eshinyasio eshilulu muno.

Ne baboolele amakhuwa kabacheni ba Ibrahim.

Olwa benjila ewuwe nibaboola mbu; “mulembe” naboola mbu toto efwe khubakorerwe.”

Nibaboola mbu; Olaria tawe efwe khukhusubisia omusiani wa machesi amanji”

Naboola; “Oh! Mumbolelanga kano, nemalile okhukofula, kho ni munjila shina yamumbolelangamwo kano?”

Nibaboola mbu; “Toto efwe khukhuboolela khubwatoto kho sholaba mubalia abafwitsanga omwoyo tawe.”

Naboola mbu; “Ne niwina ufwitsanga omwoyo okhurulana nende tsimbabaasi tsia Nyasaye wuwe halali balia abakora?”

Naboola; “Mana shiamumbolela shindi nishina enywe abarumwa?

Nibaboola mbu; “Efwe khurumilwe khubandu abamabii”

halali balia abaloonda Luti. Toto efwe khwitsa okhuhabina abo boosi.

halali omukhasi wuwe khumalile okhulola mbu alaba mubandu balitong’a inyuma.

Mana abarumwa olwa boola khubandu ba Luti.

(Luti) naboola; “Toto enywe muli abandu balamanyikhe tawe.”

Nibaboola mbu; “mana efwe khukhurere kalia kabakholelanga obukanakani”

“Ne khukhwitsile khubulaamba, netoto efwe khuboolanga obwatoto.”

“Kho rula nende abandu bawo, ebise bilala mubise bieshilo, nawe abalondekhwo, neyesiyesi mwinywe alakalukhanakhwo okhuhenga inyuma tawe, nemutsie wamulomesibungwa.

Nenikhumubuusilia likhuwa elo, mbu emisi chiabu chitsa okhutetwa mumabwibwi.

Ne abandu belitokho elo nibetsa nibasangalile.

Naboola mbu; “Toto bano ni abacheni banje khomulafimbia omurwe tawe”

“Ne murie Nyasaye, ne mulafimbia omurwe tawe”

Nababoola mbu: “efwe shikhwakhukaniakho (okhurera) abandu (belwanyi)?

Naboola mbu: “ bano nabakhana banje itse ebahelesie(mubateshie) toto enywe nimuli abakholanga.

Nditsuba khulubaka lulwo, mbu : “abo bali mubumesi bwabu nibanyakhananga eshikhaya.”

Mana eshinyasio shioluyoka nishibabukula mumabwibwi.

Mana nikhukhola hasi wabu okhuba hekulu, mana nikhubakwisilia ifula ya machina yeliloba lwomumulilo.”

Toto mu ako khulimwo nende ameeko khubandu baretsanga amakhuwa khushichelo.

Ne toto tsingongo etso tsili khutsinjila tsiburungwakhwo.

Toto mu ako khulimwo nende ameeko khubasubili.

Netoto abandu bomushitsimi bali ababii.

Mana nikhubahelesia eshinyasio, ne ebialo bibili bino bili khunjila ili habulafu.

Netoto abandu ba Hijri bayingasia abarumwa.

Ne nikhubahelesia abimanyisio biefu nabo nibalabukulamwo oluchendo tawe.

Ne bakwotanga nibakasiatsinzu mutsingulu nomulembe.

Mana eshinyasio shioluyoka nishibabukula mumabwibwi.

Mana akabakholanga nikalabakhonyakhwo shiosi shiosi tawe.

Ne shikhwalonga likulu nende eshialo nende ebili hakari wabio halali khubwatoto,ne toto indukho iliula , kho leshela okhuleshela okhulayi.

Toto Nyasaye wuwo omulesi niye omuloonji ne niye omumanyi muno.

Ne khwakhwelesia tsinyaali saba tsisomungwa ebise nebise nende Ikurani yoluyali.

Ne olakhosia tsimoni tsitsio khukalia akakhwa helesia emikanda chindi hakari wabu,nohomba olababelelela tawe. Ne wishilie abasuubili olubaa lulwo. (lwetsimbabaasi)

Ne boola mbu: “ toto esie nesie omwikanyilisi omwinoosi.(owahabulafu)

Shingala khweshilia balia (eshinyasio boosi) balia abekaba emikanda (okhwikalila abusalamu).

Balia bakhola Ikurani okhuba omubunjikho kwobubeyi.

Kho nditsuba khu Nyasaye wuwo omulesi mbu khulibareeba boosi.

Khukalia koosi akabakholanga.

Kho yusia akawalomesibwa ne obe ehale nende abatsokaasi.

Toto efwe khukhuyela okhulinda nende abakhubayilanga.

Balia abatsokasinjia Nyasaye nende abanyasaye bandi balitsa okhumanya.

Netoto khwamanya mbu eshilifu shishio shinyoolanga obusiro khukalia akababoolanga.

Kho tswenula Nyasaye wuwo omulesi khulwa okhumwitsoomia , ne obe halala nende bamwinamilanga (nibasujuda.)

Ne olaame Nyasaye wuwo okhuula likhulile likhuwa eliatoto elo . (lifwa).