Al-Ankabut

ALif Lam Mym

Koo, abandu baparanga mbu balalekhwa butswa shichila baboolanga mbu “khwasuubila” Kho shibatemwa tawe?

Toto khwatema balia abaali imbeli wabu, ne toto Nyasaye alabamanya balia abahabwene ne toto alamanya ababeeyi.

Koo, balia bakholanga amabii baparanga mbu balakhushila efwe. Okhubusia okhubii muno khwababusinjia.

Ulia wenya okhubukanana nende Nyasaye, Toto ebise bia Nyasaye bitsa okhuula, naye niye omuwulili muno, omumanyi po.

Ne ulia ukhalabana toto yekhalabanila omwene, Toto Nyasaye nomuyinda khubiloonje bioosi.

Ne balia basuubila mana nibakhola amalayi, toto khulibaleshela amabii kabu ne khulibarunga amalayi kabu kabakholanga.

Ne khwebaalila omundu mbu akhole amalayi khubeebusi beebe, ne nibakhunichilisia okhusanjia nende shiosishiosi eshiobula nashio obumanyi, alabawulila tawe , ewanje newo amulikalukha ne ndilibaboolela akamwakholanga.

Ne balia basuubila mana nibakhola amalayi toto khulibenjisia mubandu abalayi.

Ne mubandu baliho ababoolanga mbu khusuubile Nyasaye, ne olwa basinyisibwa khunjila ya Nyasaye, bamalanga bakhola amabii ka abandu okhuba shinga eshinyasio shia Nyasaye. Ne obuhabini okhurula khu Nyasaye wuwo nibuula ni baboola mbu; “Toto efwe khubeele halala ninanyu” Koo! Nyasaye shamanyile akali mumioyo chabandu tawe

Ne toto Nyasaye alara habulafu balia basubila ne alababuula abeshikhabili.

Ne balia abakhaya baboolela balia abasuubila mbu; “Loonde khunjila yefu, efwe nafu khulachinga tsimbii tsienyu” Ne shibali banyala okhuchinga khutsimbi tsiabu shiosi shiosi tawe. Toto bo ni ababeeyi.

Netoto balichinga emisiko chiabu, nende emisiko chindi halala nende echiabu, Ne toto balirebwa inyanga yeyindukho khukalia akabachikhanga.

Netoto khwaruma Nuhu khubandu bebe, mana namenya nabo emika iyelefu okhuyiniakhwo emika amakhumi karano, mana amatsi nikababukula nabo nibali aboononi.

Mana nikhumuhabina nende abandu beisafina, ne nikhukhola shibe ishimanyisio khubandu.

Ne Ibrahim olwa yaboolela abandu bebe mbu; “Mulaame Nyasaye nemumurie, ako ni amalayi khwinywe ni muba nimwakhamanya”

“Toto enywe mulaamanga ebifwanani nimulekha Nyasaye ne mukasinjia obubeyi, toto balia abamulamanga abalali Nyasaye abo shibanyala okhumuhelesia enywe omukabo tawe, kho khaabe omukabo kwenyu ewa Nyasaye ne mumulaame ne mumukhupile orio. Ewuwe ni amalikalusibwa.

Ne nimuyingasia, bamala okhuyingasia abandu baliho imbeli wenyu. Ne shikali khu Murumwa tawe halali okhusia khwa habulafu.

Koo, shibalolangakhwo shinga Nyasaye achachinjia ebiloonje, mana khandi alibikalusia. Toto ako khu Nyasaye ni amaangu.

Boola; “Chende khushialo mana mulolekhwo shingala yachachia okhuloonga, mana Nyasaye niye uliloonga ifwani yokhumalilikha. Toto Nyasaye ni omunyali wabuli eshindu.

Alihelesia eshinyasio owayenya na alihelesia tsimbabaasi owayenya. Na ni ewuwe ni wamulikalusibwa.

Ne enywe shimunyala okhumushila (Nyasaye) khushialo nohomba mwikulu tawe, Nanyu mubula omulindi nohomba omukhonyi owulali Nyasaye tawe.

Ne balia bakhaya ebimanyisio bia Nyasaye nende okhubukanana ninaye, abonibo baliwesiakhwo omwoyo khutsimbabaasi tsianje. Nabo nibo abalinyoola eshinyasio eshilulu.

Mana amakalusio kabandu be shikali halali okhuboola mbu: “mumwire nohomba mumusaambe mumulilo” mana Nyasaye namuhonia okhurulana nomulilo, Toto mu ako khulimwo nende eshimanyisio khubandu basuubilanga.

Ne naboola mbu; “Toto enywe mwakhola ebifwanani okhuba Nyasaye, ne mwachamana abeene khubulamu bwokhushialo, halali inyanga yeyindukho muliikanana abeene khubeene, ne mulitsubana ne eshimenyo shienyu shiliba mumulilo, ne shimulinyoola wokhubahabina tawe.

Mana Lut namusuubila, ne (Ibraheem) naboola mbu; “Toto esie ewuyaa(khulwa) Nyasaye wanje toto ye niye owamaani owamachesi muno.

Mana nikhumwehelesia Ishaq nende Yaqub, mana nikhukhola khulwibulo lulwe oburumwa, nende eshitabu, mana nikhumuhelesia omurungo kukwe khushialo. Netoto ye mwikulu aliba mubandu abalayi.

Ne Lut, olwayaboolela abandu bebe mbu; “Toto enywe mukholanga eshifwoolo, eshia omundu yesiyesi alabaranjililakhwo okhukhola tawe khushialo.

“Koo enywe mutsiilanga abasatsa, ne mulindanga abandu khunjila, ne mukholanga amabii mumikhung’ano chienyu?” Kho mana amakalusio ka abandu bebe shikali halali okhuboola mbu; “khurerere eshinyasio shia Nyasaye toto noli mubalia ababoolanga aka habwene”

Naboola mbu; “Nyasaye wanje habine okhurulana nende abandu abonooni.”

Ne Abarumwa befu (Malaika) olwa betsela Ibraheem, nende amakhuwa amalayi, baboola mbu; “Toto efwe khwitsa okhusishia abandu belitokho lino, toto abandu balio ni abonooni muno.”

(Ibraheem) Naboola mbu; “Toto Lut alimwo” nenibaboola mbu; “Efwe khumanyile balia balimwo, khwitsa okhumuhabina ye nende beyinzu yiyie halali omukhasi wuwe, owuli mubalia batong’a inyuma.”

Ne olwabarumwa befu boolela Lut, yababelelela muno, ne omwoyo kukwe nikulola obusiro muno khulwabo, mana nibaboola mbu; “olaria nohomba olabeelela tawe, toto efwe khwitsa okhuhabina ewe nende abandu bobo halali omukhasi wuwo owuli mubalia batong’a inyuma.

“Toto efwe khwitsa okhwishia khubandu bolukongo luno eshinyasio okhurula mwikulu shichila okhuloba khwabu”

Netoto khwalekhamwo eshimanyisio shiahabulafu khubandu baparanga.

Ne Madiani khwaruma omusiani wabu mbu Shueibu, naye naboola mbu; “Enywe abandu banje, mulaame Nyasaye ne murie inyanga yeyindukho, ne mulachenda khushialo nimukhola obwonooni tawe”

Mana nibamuyingasia mana omurengo kweshialo nikubeera mama nibubashiela mutsinzu tsiabu nibalaambile mafumama.

Nende Babu A’di nende Thamudi (khwabasishia) Ne mushimenyo shiabu khubaloleshelanga (okhusishibwa khwabu) Ne shetani yabaronela ebikhole biabu, mana nabekalila injila(yamalayi) nabo bali nibalolanga.

Nende Qaruni nende Firauni nende Haman, Netoto Musa yabeetsela nende obimanyisio ebiahabulafu mana nibelola khushialo, ne shibanyala okhumushila tawe.

Kho buli shiamulala wabu khwamutila nende eshinyasio khulwe tsimbii tsitsie, Abaandi mubo khwabarerera imbumbeyeka yetsimbale, ne abaandi mubo baliwo barusibwa emioyo khuluyoka, ne abandi mubo baliwo bakhwakhola liloba okhubamila, ne abaandi mubo baliwo basishibwa munyanza, ne Nyasaye shiyabakholela obubii tawe, halali bo abeene nibo bekholela obubii.

Balia abakhola abanyasaye bandi abalali Nyasaye tawe balishinga olububi lukasilinjia inzu, ne toto inzu indeshele muno okhushila etsindi ni inzu yolububi. Abayiee bamanyangakhwo!

Toto bwene Nyasaye yamanya ebiabalaamanga ebilali ye, nibalekha Nyasaye, naye niye owaamani, owamachesi muno.

Ne okho nikhwo okhuchelesia khwakhuchelasilinjia abaandu, ni shibaparanga (okhuchelasia okho) tawe halali abamanyi.

Nyasaye yaloonga likulu nende eshialo khubwatoto, toto mu ako khulimwo nende eshimanyisio khubasuubili.

Soma akawafimbulilwa mushitabu ne ulumilile okhulaama, toto okhulaama khwikalilanga eshifwolo nende tsimbi, ne obwitsulilo bwa Nyasaye nibwo obukhongo muno, Ne Nyasaye amanyile muno akamukholanga.

Ne mulayingana nende abandu beshitabo tawe halali khukalia amalayi, okhuyiniakhwo khubalia bakhola obubii mubo, Neboole mbu; “Khusuubile khukalia keshibwa khwifwe, nende keshibwa khwinywe, ne Nyasaye wefu nende Nyasaye wenyu ni mulala, nafu khuli bokhwihotselesia khuye.”

Ne endio nilwa khwakhwishilia eshitabu, nebalia abakhwahelesia eshitabu basuubilanga mushio, ne baliho mubano balia basubilangamwo, ne shibakhayanga ebimanyisio biefu tawe halali abandu abakhayi (balia benya okhufisa obwatoto.)

Ne shiwali niwasomakhwo eshitabu shiosishiosi tawe, obwatoto nibushili okhurula, nohomba shiwashihandikakhwo nomulunji kwo tawe, bakhabele neshibeyibeyi balia benyanga okhukalukhania obwatoto.

Halali tsino nitsinyaali tsili habulafu mubilifu bia balia bahebwa obumanyi, Ne shibakhayanga tsinyali tsiefu tawe haali aboononi.

Ne baboola mbu “shichila shina naleshilibwa amangalimwa okhurula khu Nyasaye wuwe?” Boola mbu; “Amangalimwa kali khu Nyasaye yenyene butswa, nesie endi butswa omwikanyilisi owahabulafu.”

Koo shikabayelasa mbu efwe khwakhwishilia eshitabu basoomelungwa, Toto mu ako khulimwo nende tsimbabaasi nende ametsulisio khubandu basuubilanga.

Boola mbu; “Nyasaye ayela okhuba omuloli hakari wanje ninanyu, amanyile kali mwikulu nende mushialo, Ne balia bafuchililanga obushiamu ne nibakhaya Nyasaye, abo nibo abalalinyoola obukhala.”

Ne bakhuyungubashinjia mbu eshinyasio shuule lwangu, ne bikhaya okhuba ebise bimanyikhane, eshinyasio shakhaboolele, netoto shilibetsela mapwoka nabo nibalamanyile tawe.

Bakhuyungubasinjia khushinyasio, ne kali mbu toto Jahanam yabotokhanilibwa abakhayi.

Inyanga yeshinyasio shilibafunikha okhurula hekulu wabu nende hasi webileenje biabu, mana aliboola mbu; “pile kalia akamwakholanga”

Enywe abasumba banje basuubila, toto eshialo shianje neshibangufu, kho munaame esie butswa.

Buli omwoyo kulipila lifwa, mana ewefu niwamulikalusibwa.

Ne balia basuubila mana nibakhola ebikhole ebilayi, khulibekhasia mwikulu mutsinzu etsiburanga hasi watsio emialo, balimenyamwo tsinyaanga tsiosi, Ne omurungo omulayi kuli kurie kwabakholi!

Balia abesumilisia mana besikanga Nyasaye wabu butswa.

Ne nitsisolo tsinga atsilakhanyala okhuchinga omukabo kwatsio,ne Nyasaye atsikabilanga nende enywe mwesi, naye niye amuwulili muno omumanyi po.

Nenobareeba mbu; “Niwina waloonga likulu nende eshialo, ,mana nakhola eliuba nende omwesi okhuwulila? Toto balaboola mbu; “Nyasaye” Kho niyena amukalukhasibungwa?

Nyasaye abambulilanga omukabo owayenya ne amufumbila owayenya, Toto Nyasaye ni omumanyi wabuli eshindu.

Ne nobareeba mbu; “Niwina wishinjia amatsi okhurula mwikulu, mana alamusie liloba nilimalileenje okhufwa?” Toto balaboola mbu; “Ni Nyasaye” Boola mbu; “Oluyali lwoosi luli khu Nyasaye” Halali abaanji mubo shibamanyanga tawe.

Ne obulamu bwokhushialo buno shini eshindu tawe halali amakhuwa kabulamwo oluchendo nende omubayo. Ne eshimenyo shiomwikulu nshio shiatoto, abayie bamanyangakhwo!

Ne nibanina muliaro (Munyanza) balaamanga Nyasaye mubutswenufu, Ne niyakhamala okhubahabina nibakhoola khulukongo, nibachaka okhumutsokaasia.

Khobanyoole okhubula okhupa orio khukakhubahelesia mbu khobekhoye, halali ahambi hano balamanya.

Koo shibalolangakhwo mbu efwe khwakhola eshialo shiabu okhuba shioluyali nende omulembe, ne abaandu bayulungwa mumbeka mwabu. Koo musubilanga obushiamu ne tsimbabaasi tsia Nyasaye nitso tsamukhayanga?

Ne niwina omubii muno oyo, okhushila ulia uchishila Nyasaye obubeyi, nohomba ukhaya obwatoto nibumalile okhumuulila? Koo Jahanam shinishio shakhabe eshimenyo shabakhayi?.

Ne balia bakhalabana okhubeela efwe, toto abo khulabalunjisia khutsinjila tsiefu, netoto Nyasaye ali halala nende bakholanga amalayi.