Al-Baqarah

Alif lam Mim.

Shino nishio eshitabu shibulamwo obutokani nishiobulunjifu khubalia baria Nyasaye.

Balia basuubilanga mubilalolekha, abalaamanga Iswala khatsotso, ne barusinjia eshihanwa khumukabo kwa khubakabile.

Balia basuubilanga khu kalia keshibwa khwiwe, nende kalia keshibwa imbeli wuwo, ne basuubilanga muno inyanga yeyindukho.

Abo bali khubulunjifu okhurula khu Nyasaye wabu, ne abo nibobalibura.

Toto balia abakhaya ni halalasa awo, obekanyilisie nohomba oleshe okhubekanyilisia shibalisuubila tawe.

Nyasaye yara eshifunikho khumioyo chiabu nende khutsimbulililo tsiabu nende khutsindolelo tsiabu, mana bali nende eshinyasio eshikhongo.

Ne mubandu baliho baboolanga mbu khwasuubila khu Nyasaye nende inyanga yeyindukho ne nibalali abasuubili tawe.

Bakatinjia Nyasaye nende Abasuubili, halali abene nibo bekatinjia, ne shibamanyile tawe.

Emioyo chiabu chilimwo obulwale, mana Nyasaye nabameta obulwale, ne bali nende eshinyasio eshilulu khukhuboola khwabu obubeyi.

Ne nibabolelwa mbu mulakhola obutobela khushialo tawe, nabo babola mbu “toto efwe nefwe abakholi bamalayi.”

Koo, toto abo nibo abamabii, halali shibesundukhanga tawe.

Ne nibaboolelwa mbu suubile shinga abandu basuubila, nibaboola mbu “khusuubile, shinga abasilu basuubila?” Koo toto abo nibo abasilu halali shibamanyile tawe.

Ne nibabukana nende abasuubili baboola mbu “khwasuubila” ne nibenjila mumashetani kabu, baboola mbu; “Toto efwe khuli ninenyu, toto efwe khukholanga butswa omubayo”

Nyasaye ababayila ne abalekha mubukori bwabu nibayiyayiya.

Abo nibo bakalukhasia obukori habundu wobulunjifu, mana inganga yabu nilanyoola obukhala tawe, mana nibalaba abalunjifu tawe.

Ifwani yabu ili shinga, ulia wafia omulilo, olwakwarusia obulafu, balola ebili mumbeka tsiabu, Nyasaye nabukula obulafu obo, nabalekha mushiilima, nibalalola shiosi shiosi tawe.

Abatimbe, Abasilu, Abawofu khulwa ako shibalikalukha (balola obulaamba) tawe.

Nohomba ifwani yabu ilishinga omukanda kundi kwabeshikhabili , abwatoto nibubaloleshela ebise bindi babetsanga nende eshibeyibeyi ifwani yabu ilishinga abandu bachendanga mushitsimi, nipoopwa nende ifula inyinji, ilondokhana nende eshiilima tititi, nende khwatulukha khwelikulu nende okhumiesukha, shinga ifula okhurula mwikulu, ili nende eshilima nende okhwatulukha, nende okhumiesukha, Baretsanga tsinzala tsiabu mumarwi khulwa okhwatulukha khwelikulu, nibarire okhufwa, Ne Nyasaye niwokhutererera abakhayi- (shimanyala okhupwotsokha tawe)

Okhumiesukha khwelikulu khwukhaaba hambi okhuwofusia tsimoni tsiabu, buli shinga abamiesulila bachenda nenishiilima nibeema. Ne Nyasaye yenyanga yakhabukule amarwi kabu nende tsimoni, toto Nyasaye nomunyali wa buli eshindu.

Enywe Abandu mulaame Nyasaye wenyu owabalonga nende balia abali Imbeli wenyu, kho munyoole okhuria.

wabakholela liloba okhuba obulili nalo likulu okhuba shinga eshitsafu, mana niyeshia amaatsi okhurula mwikulu mana nabamesilia ebiamo khumukabo kwenyu, kho mulakholela Nyasaye ebifwanani nimumanyile tawe.

Ne nimuli mubukanakani khukalia aka khweshila omusumba wefu, mana murerekhwo isura ndala shinga eyo, mana mulaanje abaloli benyu, abalali Nyasaye tawe, toto nimuli abahabweene.

Ne nimulakhola murio tawe, neshimulikhola tawe, kho murie omulilo kwetsikhwi tsiakwo ni abandu nende amachina, kwarecheshelwa abakhayi.

Ne suubisia balia basuubila mana nibakhola amalayi mbu, balinyoola emikunda chia amatsi kakhulukusinjiamwo, ne olwa balikabwamwo ebiamo baliboola mbu; “kuno niko omukabo kwefu kwakhwahebwa imbeli. Ne balirererwa ebiamo bifwanana. Nebalinyoolamwo abakhasi abatswenukhu, nebalimenyamwo tsinyanga tsiosi.

Toto Nyasaye shalolanga tsisoni okhufwananisia, kata nili isuna nende shili hekulu wayio, Nebalia basuubila bamanya mbu toto ni obwatoto okhurula khu Nyasaye wabu, ne balia bakhaya baboolanga mbu; “nishina shia Nyasaye yenya okhukhufwananisia khuno?” Abakosia abaanji ne alunjisia abaanji, Ne shalekhanga bakora halali balia abafunakanga amalako.

Balia bafunakanga amalakano ka Nyasaye nibamalile okhulakwa, ne bakhalakanga aka Nyasaye yolomesia mbu kongasibwe, nebakholanga amabii khushialo, abonibo abalisikha.

Mukaananga murie Nyasaye ne mwali abafuu mana nabalamusia, mana khandi alibafwisia, khandi alibalamusia, mana ewuwe niyo amulikalusibwa.

Ye niye owabalonjela ebili khushialo biosi, mana naleng’ana hekulu, nalonga amakulu Saba nakaleng’asia, naye niye omumanyi wabuli eshindu.

Olwa Nyasaye wuwo yaboolela Abamalaika mbu; “toto esie nditsa okhura khushialo omulondelesi wanje” Abamalaika nibaboola mbu; “Koo olaramwo ulia ukholamwo amabii nasundulamwo amatsayi ne efwe khukhwitsominjia oluyali lulwo ni khukhwiteka khubutakatifu bubwo” Nyasaye naboola mbu; “Esie emanyile kamulamanyile tawe.”

Niyechesia Adam amera kebindu bioosi, mana namwemia halala nende Abamalaika, naboola mbu; “Mumbolele amera kebindu bino, toto nimuli ababwene.”

nibaboola mbu “(Subhanaka) obutswenukhu bwosi nobubwo- Khubula amachesi halali kalia kokhumanyiye. Toto newe wobumanyi owamachesi.”

Nyasaye nababoola; “Ewe Adam! Baboolele amera kabio” Olwa yababolela amera kabio, Nyasaye yaboola mbu; “esie shindababoolela mbu ndamanya akefisile akali mwikulu nende khushialo ne emanyile kamuretsanga habulafu nende kamufisanga?.”

Ne olwakhwaboolela Abamalaika mbu; “Inamile Adam!” mana nibamwinamila boosi halali Ibilisi, naloba nafura mana naba mubakhayi.

Nikhuboola mbu “Ewe Adam menya nomukhaye wuwo mumukunda, ne muliemo obwokholo bwosi bwosi obwamwenya, ne mulasita ahambi khumusala kuno tawe mulaba mubalia bakholele obubii”

Halali shetani yabareresia mana nabarusia khukabalimwo, mana nikhuboola mbu “Yikhe hasi, ne mulaba abasuku abene khubene. Ne khushialo nisho shilaba eshimenyo shienyu nende omwikhoyo kwebise.

Adam nanyoola amakhuwa okhurula khu- Nyasaye wuwe omulesi, (kokhusaba obulesheli) mana Nyasaye wuwe namuleshela, Toto ye ni Omunji Owobulesheli Owetsimbabaasi.

Nikhuboola “yishemwo mwesi, na toto obulunjifu okhurula khwisie bulabetsela, mana abaloonda obulunjifu bwanje obo shibaliba nokhuria nohomba shibalibeelela tawe.

Ne balia bakhaya nibafunaka ibimanyisio biefu, abo nibo abaliba abandu bomumulilo, balimenyamwo tsinyanga tsiosi.

Enywe Abaana ba Israili! Yitsulile tsimbabaasi tsianje tsiandabahelesia, mukhole shinga khwalakana, nasi ndalakhola shinga khwalakana, ne murie esie sa sienyene.

Ne musuubile amakhuwa kandeshia akonga omukhono kamulinako, ne mulaba abambeli okhukakhaya tawe, ne mulakusia ebimanyisio bianje khubukusi obutiti tawe, ne muriesa esie.

Ne mulasaasia obwatoto nende obubeyi tawe, ne mulafisa obwatoto nanyu nimumanyile tawe.

Ne mukhole eshinani khu khulaama (iswala), ne murusie eshihanwa (izakaa), ne mwiname halala nende benamanga.

Koo, mwakhalomesinjia abandu okhukhola amalayi, nanyu abeene mwiyibilila, ne musomanga eshitabu! shimuparangakho tawe.?

Ne khaabe obukhonyi khulwokhwifwila nende khulwokhulaama, ne toto likhuwa elo nilitinyu halali khubalia abahotselefu.

Abasuubila toto mbu balibukanana nende Nyasaye wabu Omulesi, ne mbu toto balikalukha ewuwe.

Enywe abana ba Israil! Yitsulile Tsimbabaasi tsianje etsiandabahelesia mana nebakholela okhushilakho abandu bandi boosi.

Ne murie inyanga ya omundu alalikhonya owundi liosi-liosi nohomba shalisabila yesiyesi eshileshelo nohomba sishilibukulwa shiosi shiosi shiokhununula tawe, ne shibalihabinwa tawe.

Ne olwa khwabahabina okhurala khubandu ba Farauni, ababasandinjia eshinyasio eshibi abasinzanga abana benyu abasiani, nenibalekha abakhana, ni mukano ni amatemo amakhongo okhurula khu Nyasaye wenyu omulesi.

Ne olwa khwaara inyanza okhubeela enywe, ne nikhubahabina, nenikhusishia abandu ba Farauni, nanyu nimulolanga.

Mwitsulile olwa khwalaka Musa tsinyanga amakhumi kane (okhole amalamo malondokhania kho khumuwe Itaurati), Mana nimukhola eshimosi (okhuba Nyasaye wenyu) inyuma wuwe, mana nimuba abakholela obubii emioyo chenyu.

Mana nikhubaleshela okhurulana nende ako, kho munyoole ukhupa orio.

Ne yitsulile olwa khwahelesia Musa eshitabu nende Ifurqani (yokhwawukhasia akatoto nende akalali katoto), kho munyoole okhulunjikha.

Ne yitsulila olwa Musa yaboola mbu; “Enywe abandu banje- toto enywe mwikholele obubii khulwa okhukhola eshimosi (okhuba nyasaye wenyu) Kho musabe eshileshelo khumwami wenyu, ne mwikalile emioyo chienyu (khulwokhwira ababii balimo), obo nobulayi khwinywe khu mulonji wenyu, mana nabaleshela, toto niye Omulesheli Owetsimbabaasi.

Ne (yitsulila) olwa mwabolela Musa mbu shikhulakhusuubila mukokhuboolelanga tawe okhula khulole Nyasaye netsimoni tsiefu, mana lifwa nilibayula nanyu nimulolanga.

Mana nikhubalamusia okhurula mulifwa lwenyu khomunyole okhupa orio.

Mana nikhubahelesia eshinikha shiamalesi, mana nikhubeshilia mana nende salwa, (ibilibwa bwomwikulu) lie mubilayi biakhubakabile ne shikhwa bakholela obubii tawe halali abeene nibo bakholela obubii emioyo chiabu.

Ne (Itsulile) olwa khwaboola mbu injile mulukongo luno, mana muliemo shingamwenya, na mwinjile mumuliango wako nimwihotselesiye niboole mbu khuleshele tsimbi tsiefu, khulabaleshela tsimbi tsienyu, na khulametala abakholi bamalayi.

Mana abakhola amabii nibakalukhania likhuwa liababoolelwa, mana nikhubeshilia eshinyasio eshikhongo okhurula mwikulu khulwa obukalakala bwobwononi bwabu.

Ne”itsulile” olwa Musa yasaba Nyasaye amatsi khulwa abandu bebe, mana nikhumuboolela mbu “khupa indabushi yiyio khwichina” Mana tsindoto ekhumi na tsibili nitsirunduka, mana buli ikholo nimanya habundu wayo wokhunywa, Mulie mana munywe khumukabo kwa Nyasaye ne mulakhola obwononi khushialo tawe.

Ne (Yitsulile) olwa mwabolela Musa mbu; “shikhulesumilisia okhulia eshilibwa shilalasa tawe, kho khusabile Nyasaye wuwo akhurusilie bilia bimelanga mwiloba shinga eliani lialio nende amaondo kalio nende imele yalio nende tsing’oli tsialio nende ebitunguo balio, Nyasaye naboola; “mukalukhasinjia ebindu ebiasi nende ebindu ebilayi bino? Mana tsie mulukongo, eyo mulanyoolayo biamusabile” mana nibakhupwakho eshimanyisio shiobuteshele, nende obumanani, mana nibakhoyesheya liruma lia Nyasaye, kano nilwokhubeela mbu bakhayanga amakhuwa ka Nyasaye, ne beeranga Abarumwa eshikhayasa, Ako nilwakhuba okhukhaya khwabu nende okhubura khwabu eshichelo.

Toto balia basuubila nende balia abayahudi nende abakiristo nende abasabai, yesi yesi wasuubila mu Nyasaye nende inyanga yeyindukho, mana nakhola ebikhole ebilayi, balinyola omurungo kwabu khu- Nyasaye ne shibaliba nende oburi nohomba shibalibeelela tawe.

Ne (Yitsulile) olwa khwabukula indakano ninenyu, mana nikhuba chingulila eshikulu, (nikhubabolela mbu) tile nende amani amakhuwa kakhumuhele Kano, na itsulile amakhuwa kalimwo kho munyole okhuria Nyasaye.

Mana nimukalukhana okhurula hawo, Bukhayanga okhuba obulai bwa Nyasaye nende tsimbabaasi tsisie mwakhabeele mubasikha.

Netoto mwamanya amakhuwa kabandu bakhaya okhuloonda amalako- mwinye (kokhuria) Inyanga ye isabato (yajumamosi), mana nakhubaboolela mbu mube “ amashene amateshele”

Mana nikhukhola eshinyasio esho okhuba amekanyilisio khubalia bali khubise biabu nende abetsa inyuma wabu mana nikhukhola okhuba amachelo khubalia bamuritsanga Nyasaye.

Ne (Itsulile) Olwa Musa waboolela abandu bebe mbu; “Nyasaye abalomesinjia mbu musinze ing’ombe” nibabola mbu “Koo okhukholelanga omubayo?” Naboola mbu; “Ndilinda khu- Nyasaye okhuba mubasilu”

Nibaboola, “khusabile khu- Nyasaye wuwo akhwinoosilie ni ing’ombe ili irie? Naboola; “toto ye abolanga mbu Ing’ombe ilali ingofu nohomba indoro tawe, halali niya hakari awo, kho kholeshingala mulomesibungwa.

Nibaboola; “Khusabile Nyasaye wuwo akhwinoosilie niyobukondo shina? Naboola; “Ye aboolanga mbu ing’ombe eyo niya namabuyu ne obukondo bwayo busangasia abachilola.

Nibaboola khusabile Nyasaye wuwo, ukhwinosilie ni ili irie? Shichila toto tsingo’mbe tsikhufwananile, ne toto Nyasaye nachama khwitsa okhulunjikha.

Naboola mbu, ye aboolanga mbu shini ingombe yokhulima tawe, nohomba shini yokhutsushilisilia amatsi emimela tawe, obukondo bwayo nobutswenukhu po, bubulamwo amapalala. Nibaboola “lano toto wakharera amakhuwa kwa abweene.” Mana nibayisinza ne nibabelenje ehale okhukhola endio.

Ne (yetsulile) olwa mwera omundu mana nimukabukhanamwo khulwa ako, (abandi babola mbu nilebe nabandi babola mbu ni lebe) Ne Nyasaye niye omurusia wako kamwali nimukafisile.

Nikhuboola mbu mukhupile nende ibuleka wosiwosi weying`ombe eyo, Endio nilwa Nyasaye alamusinjia abafu, ne abamanyia ebimanyisio bibie khomunyoole okhumanya.

Mana emwioyo chenyu nichiba emiumu okhurula hao, nichiba shinga amachina nohomba okhushilakho omachina, shichila amachina kandi kaliho karulangamwo emialo, ne akandimwo kaliho katikhanga nikarulamo amatsi, ne akandi kaliho kakwitsanga khulwokhuria Nyasaye (Ne enywe abayahudi shimutilikhangakho khu liosi liosi) Ne Nyasaye shang’ang’alilanga kamukholanga tawe.

Enywe mparanga mbu balabasuubila, ne abandi mubo bawulilanga amakhuwa ka Nyasaye, mana nibakakalukhania nibakhakamanya obulayi, ebilali mukhukorwa tawe.

Ne nibabukana nende abasuubili nibaboola mbu khwasubila (toto Mohammad yarumbulwa mubitabu biefu) ne nibenjilanamo abeene khubeene baboola mbu; `Mubabolelanga aka Nyasaye yabafungulila (khobakhuyasie) khobakhushile ebifune khu Mulonji wabu shimuparangakho tawe.

Shibamanyile mbu toto Nyasaye yamanya akabafisanga nende akabaretsanga habulafu.

Ne khulimwo mubo nende timbiti, abandu balamanya okhusooma, halali eshiwonya shobusilu, nebabula liosiliosi halali okhuparirisia butswa.

Kho eshinyasio eshikhongo shilinyoola balia bahandikanga eshitabu nemikhono chiabu, nebaboola Mbu shino shirula khu Nyasaye khobanyoole abukhala obutiti bwokhushialo, eshinyasio eshikhongo khubo - khulwakabahandinga khumikhono chiabu (nibakatilia mbu ni ka Nyasaye) Abaane khubo- balilolakhosa akabakholanga.

Ne baboola mbu omulilo shikulikhutilakho halali tsinyanga tsinditi butswa, Boola mbu, ‘koo Nyasaye yalakana ni nenyu ario?’ Kho shalikalukhana tawe. Nohomba mkatilinjia Nyasaye amakhuwa kamukorerwe.

Eeeh nendio, balia bakasia amabii – manatsimbii nitsibabotokhana abo nibo abandu bomumulilo, balimenya tsinyanga tsiosi.

Ne balia basuubilia, mana bibakhola amalayi abo nibo abandu bo mwikulu, umo balimenyamo tsinyanga tsiosi.

Ne (yitsulile amacheni kano) olwakhwalakana indakano nende abaana lwa Israili- mbu mulalaama shiosi shiosi halali Nyasaye, ne mukholele abebusi amalayi, nende abekho nende abaana abafwilwa nende abamanani, ne muboole nende abaandu obulayi, ne Mulumililie okhulaama (iswala,) nende okhurusia eshihanwa (izakaa), mana nimukalukhana halali batiti mwinywe, nanyu muako mukabulilamwo oluchendo.

Ne yitsulile olwa khwalakana indakano mbu shimularatsia amatsayi kenyu tawe, nesumulaloonda abandu benyu mutsingo tsienyu tawe, mana nimuchama nemukhaya okhukhola murio nanyu nimuliho.

Mana Enywe bano mwirananga abeene, na muloondanga abenyu baandi mutsinzu tsiabu, mubarulilanga khumabii nende obusuku, Ne nibamwitsila Abatalililwe nimubanunula, nikali mbu mwakanibwa okhubanunula, ko! Musuubilanga mubitabu bindi ne mukhaya ebindi. Mana nimurungo shina khu ukhola ako mwinywe halali eshifimbwa murwe mubulamu bwomushialo ne inyanga yobumalilishi balinyoola eshinyasio eshilulu. Ne Nyasaye shang`ang`alilanga kamukholanga tawe.

Abo nibo bayanza obulamu bwokhushialo okhushila bwa akhera (Mwikulu) Mana shibalitoratosibwa eshinyasio tawe, nekhandi shibalihabinwa tawe.

Netoto khwahelesia Musa eshibatu mana nikhumulondiakho abarumwa, inyuma wuwe, Nenikhuhelesia Isa omwana wa Mariamu abifune bili habulafu, mana nikhumuramwo amani kwo omwoyo umutswenufu (Jibril) Mana enywe olwa abarumwa babetselanga nende kemwoyo chienyu chilachamile tawe, mwelola, ne omukanda mulala nimukufukula ne ukundi nikwira.

Ne baboola mbu emioyo chiefu chafunikhwa, Halali Nyasaye yabatsuba khubukhayi bwabu, ne bali nende obuusubili butiti.

Na olwa eshibatu shiabeetsela okhurula khuNyasaye eshifuchilisania nende kabali ninako, ne inyuma hawo bali nibakonyanga okhushila abakhai. Ne mana olwa kaboolela akabali nibakamanya nibakakhaya, mana eshilamo shia Nyasaye shili khubakhayi.

Neshibi po, shiabakusilia emioyo chiabu nenibakhaya aka Nyasaye yeshia khulwa okhulola ishinda mbu Nyasaye yeshilinjia tsimbabaasi tsitsie khu ulia owayenya mubasuumba bebe, mana nibakhoyeshela liruma khuliruma, ne abakhayi baliba nende eshinyasio shiokhubatutuyia.

Ne nibaboolelwa mbu suubile khu ka Nyasaye yabeshilia, ni baboola mbu efwe khusuubilanga khukakhweshilibwa ne bakhayanga okhusuubila akali inyuma wuwe, nako nikali akatoto, akatinyisia akabali ninako. Boola mbu ne mbushina mweranga abarumwa ba Nyasaye inyuwa eyo toto nimuli abasuubili.

Netoto Musa yabetsela nende abifune biahabulafu (obwatoto) mana nimukhola eshimwosi (okhuba nyasaye wenyu) munyuma we nanyu nimuli abonooni (ababii).

Ne olwa mwabukula indakano , nenikhubaninilia hekulu olukulu, Bukule akakhwabahelesia nende amaani mana muwulile, nibaboola mbu “khuwulile mana khulobele” mana nibanywesibwa mumioyo chiabu (okhulama) eshimosi, khulwa okhukhaya khwabu,boola “nobubii buliburie buno bwobusuubili bwenyu bubalomesinjia toto nimuli abasuubili” (be itaurati)

Boola(ewe Muhammad) “Nikali mbu litaala lia akhera ewa Nyasaye nililisa elienyu mwenyene lilali liabandu bandi tawe, mana mwikombe lifwa toto nimuli abahabwene”

Ne shibalilikombakhwo tawe, khulwa okhubeela akabaranjilisia nende emikhono chiabu ne Nyasaye namumanyi muno awabamabii.

Ne toto olabanyoola abo ni bayanza muno obulamu okhushilakho balia abatsokasi, yekombanga mulala wabu mbu bakhamenyele emiika iyelefu, ne kata kario shibilamurusia mubandu beshinyasio tawe, ne Nyasaye nomuloli muno khukabakholanga.

Boola “yesi yesi uli omusuku wa Jibril, toto ye niye weshia khumwoyo kukwo Ikurani khubuchami bwa Nyasaye, itinyisinjia kalia kaliho imbeli wayio, ne ni obulunjifu nende omwikhoyo khubasuubili.

Ulia uba omusuku wa Nyasaye nende abamalaika bebe nende Jibril, nende Mikaili, toto awo Nyasaye nomushili wabakhayi.

Netoto khwakhwishilia ebifune bili habulafu ne shibabikhaya tawe halali balia abandu bafunakanga amalako.

Oh, ne buli nibabukula indakano abandi mubo bayisukunanga, ne abaanji mubo shibasuubilanga tawe.

Ne olwa yabetsela omurumwa okhurula khu- Nyasaye, utinyisia akabali ninako, abaandi mu balia bahebwa eshitabu shia Nyasaye basukuna amakhuwa ka Nyasaye inyuma wemikongo chiabu bifwane mbu shibamanyile tawe.

Mana nibaloonda amakhuwa ka mashetani kasomelanga abandu tsinyanga tsia Nabi Suleiman, Ne Suleiman shiyali omukhayi tawe halali amashetani nikokali amakhayi, kechesinjia abaandu obulosi, ne shibeshilibwa abamalaika babili mulitokho lia babil – Harut nende Marut, Ne shibechesinjia yesiyesi tawe okhuula bamuboolele mbu “efwe khulii amatemo,kho alaba omukhayi tawe,” ne bekanga okhurula khubo akakabukhasinjia omusatsa nende omukhasi wuwe. Ne nabo shibali nibanyala okhunyasia yesiyesi halali khubuchami bwa Nyasaye , nebekaanga akabawumusia neshikabakhoonya tawe, Ne toto bamanya mbu ukakula, abula ewa Nyasaye omukabo, Ni amabii karie kabakusilia emioyo chiabu, abaane bamanyangakhwo!

Ne babetsanga mbu basuubila mana baria, bakhanyoolele amalayi ewa Nyasaye, abaane bamanyangakhwo!

Enywe abasuubila, mulaboola mbu “raaina” okhwaye tawe, halali muboole mbu “ undhurna” ukhuhenge, mana muwulile, ne abakhayi balinyoola eshinyasio eshilulu.

Abakhayi mubandu bahebwa eshitabu nende abatsokasinjia Nyasaye, shibenyangakhwo mbu munyoole obulayi bwosibwosi okhurula khu Nyasaye wenyu tawe, Ne Nyasaye yawuulanga khutsiambabaasi tsisie owayenya , ne Nyasaye niwamalayi amaanji.

Olubasio lwosilwosi lwakhuyiniaho nohomba lwakhukhwibilisia khureranga olundi olulayi okhushilkho olo nohomba shinga lwo, okorerwe mbu Nyasaye ni omunyali wa buli eshindu?

Shomanyile mbu toto Nyasaye ali nende obwami bwomwikulu nende bwokhushialo, ne mubula omulindi nohomba omukhonyi wenyu owulali Nyasaye tawe.

Nohomba mwenyanga okhureeba omurumwa wenyu shingala Musa yarebwa imbeli hao, ne ukalukhania obukhayi nende obusuubili oyo toto yamala okhukora injila yahabwene.

Ne abaandu beshitabu bekomba muno okhubakalusia inyuma nimumalile okhusuubila mube abakhayi khulweyishinda okhurula mumioyo chiabu, obwatoto nibumalile okhuboolela, kho leshelane mulalingakhwo tawe okhuula shinga Nyasaye aletsa nende okhubusia khukhwe, Toto Nyasaye nomunyali wabuli eshindu.

Ne mulumilile okhulaama (Iswalaa) ne murusie eshihanwa (Izakaa), ne shosishosi shiamuranjilisia enywe abeene mumalayi mulishinyoola ewa Nyasaye, toto Nyasaye alolanga muno akamukholanga.

Ne baboola mbu “abulaho ulinjila mwikulu awulali omuyahudi noho omukristo”, Ako ni amaparo kaabu butswa. Boola mbu “rere ebifune bienyu toto nimuli abahabwene”

Ni habwene, ulia walekhuulila Nyasaye obweni bubwe mana nakhola amalayi, alinende omurungo kukwe ewa Nyasaye wuwe ne balibula obuyendi nohomba shibalibeelela tawe.

Abayahudi baboola mbu abakristo babula shiosi shiosi shiahabwene shokhwemakhwo, ne abaktristo boosi nibaboola mbu abayahudi babula shiosishiosi shiahabwene, shiokhwemakhwo nabo basomanga eshitabu, ne endio nilwababoola abakorwa amakhuwa kafwanana nende akaabu, kho Nyasaye alibakabukhasia inyanga yeyindukho khukabawukhanilanga.

Niwina omubii ushila ulia wikalila omusikiti kwa Nyasaye mbu lilarumbulwamwo elira lilie mana narakho eshinani okhukunyasia, Abo shibakhoyekhana ukhwinjilamwo halali khulwa okhumuria. Abo balanyoola khushialo omusando, ne mwikulu (akhera) balinyoola eshinyasio eshikhongo.

Ne ebukwe nende Mumbo niwa Nyasaye kho habundu wosiwosi amukalukhana- obuchami bwa Nyasaye buliho, Toto Nyasaye ni omunji muno omumanyi.

Ne baboola mbu “Nyasaye yekasilia omwana” Nyasaye ali hale nende ako- Halali ebili mwikulu nende mushialo, bioosi, bimuritsanga.

Niye omulonji Welikulu nende eshialo, ne niyenya likhuwa aboola butswa libee nilibaa.

Na abakorwa baboola mbu “shichila shina nalaboola ninafuu nohomba akhurere eshimanyisio?” endio nilwababoola balia abali imbeli wabu, amakhuwa shinga-ako, imioyo chiabu chifwanana, toto efwe khwara habulafu ebimanyisio khubandu bokhusuubila amakhuwa.

Toto efwe khwakhuruma mbu wechesie obwatoto khulwa okhurera amalayi nende okhwukanyilisia nemana sholirebwa abandu bomulilo tawe.

Neshibaliba obulayi ninanyuu Abayahudi nende Abakristo, okhuula muloonde imela yabu, Boola mbu “toto obulunjifu bwa Nyasaye nibo obulunjifu, ne noloonda akhwenya khwabu, obumanyi nibumalile okhuulila, sholinyoola omukhonyi noho omuliindi ewa Nyasaye tawe.

Balia bakhwelesia eshitabu (Taurat- Injil – Zaburi) bashisomanga ngashienyekhana, abo bashisuubilanga mwo, ne bashikhaya, abo nibo abalisikha.

Inywe abaana ba Israili!! Itsulile tsimbabaasi tsianje etsia ndabahelesia, ne mana esie nebakhola obulayi okhushila abaandu boosi.

Ne murie inyanga yomundu alalikhoonya owashie tawe, ne shalichamilwa okhununulwa tawe , ne okhusabilwa shikhulimukhoonya tawe, ne mana shibalihabinwa tawe.

olwa Nyasaye wuwo yakholela Ibraheem amarebo, mana nakabura, namuboolela mbu; “esie ekhukholele obe omwimilisi wa abaandu”Ibraheem Naboola “Ne mulwibulo lwanje?” Naboola mbu indakano yanje shiloolela abamabii tawe”

Ne ‘yitsulile olwakhwakhola inzu ibe habundu wa abaandu okhutsia, ne nikhuyikhola habundu womuleembe, Ne habundu wa Ibraheem yemanga nikhukholawo mbu abe wakhulamilao, ne khwachelela Ibraheem nende Ismaeil, nikhubaboolela mbu; “tswenule inzu yanje khulwa balia baibotokhananga nende bekhalanga, nende benamanga nende basujudanga.

Ne olwa Ibraheem yaboola mbu “Ee Nyasaye wanje, okhole litokho lino libee nomulembe ne ohelesie abamenyamwo ebiamo, bialia basuubilanga Nyasaye nende Inyanga yeyindukho”, Nyasaye naboola; “Nende kata balia abakhayi boosi, nditsa okhubaha obwokholo butiti, mana ndilibasindikhakhwo eshinyasio shiomulilo, nawo ni habuundu abii munoo wakhukalushila.

Ne olwa Ibraheem yachinguula lisisi lieyinzu nende Ismaeil, nibasaba “Ee Nyasaye wefu khuchamile emilimo chiefu chino, toto ewe ni omuwulili umuchesi muno”

“Ewe Nyasaye wefu! Okhukhole khube abehotselefu khwiwe, nende olwibulo lwefu lube lwabandu abehotselefu khwiwe, ne okhumanyie injila yemilimo chiefu, ne okhuleshele, Toto newe Omulesheli Owobukoosia.

“Ewe Nyasaye wefu! Obawulile omurumwa owurulana ninabo, abasomele tsinyali tsitsio, nende okhubechesia eshitabu nende amachesi, ne obatswenule, toto ewe newe Owaamani Owamachesi.

Ne niwina witsa okhwira ehale nende emilukha cha Ibraheem halali ulia ura omwoyo kwaye mubusilu? Ne toto efwe khwamwawula mushialo netoto ye mwikulu aliba mubaandu abalayi.

Ne “yitsulile olwa Nyasaye wuwe yamuboolela mbu “wihotselesie” naboola mbu “ndihotselesiye khu Nyasaye webindu bioosi

Ne Ibraheem nachelela (nalachilisia) abaana bebe nende Yakub, “Enywe abana banje toto Nyasaye yabalobolela idini ino, kho mulafwa nimulali abehotselefu (abasalamu) tawe”

Nohomba enywe (Abayahudi nende abakiristo) mwaliho olwa lifwa liolela Yaqoob? Olwa yaboolela abaana bebe, “ni wina wamulalaama nindakhabulao” nibaboola “khwitsa okhulaama Nyasaye wuwo nende Nyasaye wa bapapa bao balamanga, Ibraheem nende Isameil nende Is’haq Nyasaye mulalasa – ne efwe khwihotselesiye khuyee”

Abo ni abandu bamala okhubura, balinyoola omurungo khukabakholanga, nanyuu mwesi mulinyoola omurungo khukamukholanga, nanyu shimulirebwa akabakholanga tawe.

Ne nibaboola mbu mube Abayahudi nohomba Abakristo mulalunjikha, Boola : toto efwe khuloondanga omulukha kwa Ibraheem kwobulunjifu , neshiyali mubatsokaasi tawe.

Boole, “khusuubila Nyasaye nende kalia keshibwa khwifwe nende khu Ibraheem, nende Isameil, nende Is’haq nende Yaqoob, nende abaana ba Yaqoob, nende keshibwa khu Musa nende Yesu nende keshibwa khu Abarumwa okhurula khu Nyasaye wabu, shikhwitsa okhukabukhasia hakari wabu tawe nafu khuli abehotselesi khuye.

Ne nibasuubila shinga mwasuubila murio balaba toto balunjikhe. Ne nibakalukhana awo balaba bali mubutookani bwabutswa, kho Nyasaye yetsa okhulinda okhurulana nende obusuku bwabu, ye niye omuwulili omumanyi.

Obwislamu nisho - eshirone shia Nyasaye yabaronela, ne ni wina omuroni omulayi muno okhusila Nyasaye?” Na efwe khumulamangasa ye yenyene.

Boola; muyingananga ninafuu khu makhuwa ka Nyasaye, naye ni Nyasaye wefu khandi ni Nyasaye wenyu, Nafu khuli nebikhole biefu na enywe muli nebikhole bienyu, nafu ye butswa niwokhukholelanga.

Nohomba muboolanga mbu Ibraheem nende Ismaeil nende Ishaq nende Yaqoob, nende olwibulo lwa Yaqoob bali Abayahudi noho Abakiristo? Boola “nenywe mumanyile muno nohomba Nyasaye? Ne niwina omubi oyo ukhushilakho ulia ufisanga obuloli obwalinabo khu – Nyasaye, Ne shikali mbu Nyasaye shalolanga kabakholanga tawe.

Abo ni Abandu bamala okhubura, balinyoola omurungo khukabakholanga, nanyu mwesi mulinyoola omurungo khukamwakholanga, nanyu shimulirebwa akabakholanga tawe.

Abasilu mubaandu baliboola mbu; Nishina shiabarusia khukibla (habundu okhuhenga nolaama) shiabu shiabalikho?”Boola Ebukwe nende Muumbo nitsia Nyasaye; Alunjisinjia owayenya khunjila ilunjiifu.

Ne endio nolwakhwabakhola enywe abandu bahakari, khomube abaloli khubandu, ne abe Omurumwa omuloli khwinywe, Neshikhwakhola Qibla shienu shiamwalikhwo halali khokhumanye niwina uchama okhuloonda Omurumwa, neniwina ukalushila ebisisilo bie inyuma. Ne kali amatinyu halali khubalia ba Nyasaye yalunjisia, Ne Nyasaye shiyali ukosia obusuubili bwenyu tawe, toto Nyasaye khubandu ni Owetsimbambaasi Owobukoosia muno.

Toto khulutsi okhukalukhana khwobweni bubwo mwikulu, khokhwitsa okhuhelesia Qibla sho omwoyo kukwo kuchamile, kho lenjia obweni bubwo ebuleka womusikiti kwa Haram,(Makkah) Newosiwosi amuli mulenjie obweni bwenyu mumbeka mwayo, Ne toto balia bahebwa eshitabu bamanyile mbu ni obwatoto okhurula khu Nyasaye wabu, ne shibilimbu Nyasaye shalolonga kabakholanga tawe.

Ne nohelesia balia abahebwa eshitabu ebifune biosi shibalalonda Qibla shishio tawe, nawe sholi ulonda Qibla shiabu tawe, Ne abeene khubeene shibakhaloonda Qibla shiowuundi tawe, Ne niwitsukhana waloonda eshia emioyo chiabu chienya obumanyi nibumalile okhuulila ,toto hawo olaba mubandu bamabii.

Balia abakhwahelesia eshitabu bashimanya shinga bamanya abaana babu, netoto umukanda mubo bafisanga obwatoto nabo nibamanyile.

Obwatoto okhurula khu-Nyasaye wuwo omulesi olaba mubalia bakholanga ashibeyibeyi tawe.

Ne buli omukanda kwali nende akwahenganga (qibla shiakwo). kho mwitinyie okhukhola amalayi ,wosiwosi amuli Nyasaye alabarera mwesi halala, toto Nyasaye nomunyali wa buli eshindu

Ne wosisi otsia lenjia obweni bubwo khu musikiti kwo luyali kwa makka, ne obo nibo obwatoto burulanga khu Nyasaye wuwo Omulesi, ne shibili mbu Nyasaye shalolanga kamukholaanga tawe.

Ne wosiwosi otsia linjia obweni bubwo khumusikiti kwoluyali. Ne wosiwosi wamuli mulinjie obweni bwenyu eyo akuli (omusikiti oko) kho abaandu bakhaye okhuba nende eshifune khwinywe, halali balia ababii mubo, kho mulabaria tawe, halali murie esie, kho enyoole okhubabeela tsimbabaasi tsianje, khomunyoole okhulunjikha.

Shingala efwe khwabarumila omurumwa okhurula mwinywe, abasomelanga tsinyaali tsiefu nabatswenula na abechesia eshitabu nende amachesi kamwalali nimumanyile tawe.

Khomunzitsulile nditsa okhubetsulila, ne mukhupile orio, mulandobe tawe.

Enywe balia abasuubila, mwikhoonye khukhwisumilisia nende okhulaama, Nyasaye ali halala nende abesumilisinjia.

Ne mulaboola khubalia berwa nibali khunjila ya Nyasaye mbu nabafu tawe, halali ni abalamu, ne enywe shimumanyile tawe.

Ne toto khwista okhubara khumarechekho (khu Malala khumakhuwa kano) oburi, nende inzala nende obulemefu bwo mwandu nende abandu nende ebiamo, ne osuubisie Abefwilanga.

Balia banyoolungwa namasila nibaboola mbu “toto efwe khuli aba-Nyasaye ne toto efwe uwuwe ni akhulikalukha”

Abo bali nende tsikhabi okhurula khu Nyasaye wabu nende tsimbabaasi. Ne abo nibo abalunjifu.

Toto ebikulu bia safa nende Marwa, ni ebilolelo bia Nyasaye, kho ulia utsia okhuhija , nohomba okhukhola umra, shibuli obubii khuye okhubibotokhana tawe, ne ulia wikholela omwene amalayi, toto hao Nyasaye nomuunji wokhupa orio ne ni Omumanyi muno.

Toto balia bafisanga akakhweshia - nako ni ebifune bili habwene, nende obuulunjiifu- nikhumalile okhwinoosilia abandu mushitabu, abo Nyasaye abatsuba ne babatsubwa nende buli Omutsubi.

Halali balia abasaba eshileshelo, mana nibakasia mana nibeenosia, abo nditsa okhubaleshela, ne esie endi Omulesheli muno, Owobukoosia po.

Toto balia abakhaya mana nibafwa nibali abakhayi abo bali nende eshitsubo shia Nyasaye nende shia Abamalaika nende eshia Abandu boosi.

Balimenyamwo tsinyanga tsiosi, shibalitutuyilibwa eshinyasio tawe ne shibalilengwakho tawe.

Ne Nyasaye wenyu ni mulala, abulao Nyasaye oulaliye tawe, ne ni Omunji wetsimbambaasi Owubukoosia.

Toto khukhulonga likulu nende eshialo nende okhubotokhana kweshialo nende eshitere, nende amaaro kachendanga khunyanza, khukhukhonya abandu, nende amtsi ka Nyasaye yeshinjia okhurula hekulu, mana nalamusia liloba okhurula mukhufwa khwalio, mana nasalasiamo buli imbia yetsisolo, nende okhukalukhana khwomuyeka nende amalesi kalomesibungwa okhubura hakari weshialo nende likulu khulimo nende eshilolelo khubandu baparanga.

Ne mubandu balimwo balia bakholanga ebifwanani bilali Nyasaye, babichama muno shinga bakhachama Nyasaye, ne balia abasuubila bayanza Nyasaye Muno, Ne balia abakholi bamabii bamanyanga …. olwa balilola eshinyasio, mbu amani koosi ni ka Nyasaye ne Nyasaye ni weshinyasio eshilulu.

Abalondungwakho olwabalikongola balia babalondangakho, ne eno nibamalile okhulola eshinyasio, hawo obulala bwabu bulikhalikha.

Ne abalondakhwo baliboola mbu “khubetsanga nikhunyala okhukalukha khwabakhaya shingala bakhukhayile” Endio nilwa Nyasaye abechesia ebikhole biabu okhwiyitsulisia khwabu, Ne shibalirula mumulilo tawe.

Enywe abandu mulie bilimushialo abiamwasubulwa ebilayi, ne mulaloonda amasenelo kashetani tawe, toto ye ni omusuku wenyu owahabulafu.

Toto ye abalomesinjia okhukhola amabii nende eshifwabi nende okhuchishila Nyasaye akamukorewe.

Ne nibabilwa mbu “Londa ka Nyasaye yeshia” baboola mbu; “Efwe khuloonda ka khwanyoola bapapa befu nibalikho” Ko kata nikali mbu bapapa babu shibalinibamanya eshindu tawe, nekhandi nibalali abalunjifu tawe?

Ne ifwani ya balia abakhaya balishinga ulia wayulilanga ulawulila halali okhwayukha nende obuyoka. Ni abatimbe, abasilu, abawofu mana kario shibawulilanga tawe.

Eywe abasuubila lie khubindu ebilayi biakhubakabile ne mukhupile orio Nyasaye toto nimuba mbu niyesa owamulaamanga.

Toto ye yabakania okhulia ebifwile nende amatsayi nende inyama yeyimbitsi, nende esharumbulilwakho ebise bwokhushisinza lilali ilira lia Nyasaye, habula ulia wulilwa nende okhubula shingala akhola, obulali okhwikomba noho okhubura eshichelo, awo ye abula tsimbii. Toto Nyasaye ni Omulesheli Owetsimbabaasi.

Toto balia bafisanga ka Nyasaye yeshia okhurula mushitabu, nebakakusinjia ako obukusi obutiti, Abo shibalitsanga mutsinda tsiabu kulali omulilo tawe, ne Nyasaye shalilomaloma ninabo inyanga yeyindukho neshalibatswenula tawe, ne baliba neshinyasio eshilulu.

Abo nibo balobola obukori okhushila obulunjifu nende eshinyasio okhushila obulesheli, Koo bali nende manishina akokhwisumilisia mumulilo?

Endio niliokhuba mbu Nyasaye yeshia eshitabu khubwatoto, ne toto balia bakabukhanamo mushitabu bali khubushilani buli ehale muno nende obwatoto.

Obulayi shibuli mbu muhenjinjia obweni bwenyu ebuleka webukwe nende Mumbo tawe , halali obulayi ni ulia wasuubila khu- Nyasaye nende inyanga yeyindukho nende Abamalaika nende eshitabu nende Abarumwa, mana narusia omwandu khukhuyanza khukhwe, nahelesia abekho nende abafwilwa nende abamanani nende abananjira (bakhalishilwe) nende abasaba, nende benya okhununulwa-mana nibalumilila okhulaama, nende okhurusia ishihanwa. (izakaa), nende balia bakholanga shinga balakana khundakano yabu, nende befwilanga mubunyakhani nende ubumisanio bweliyie. Abo nibo abachama, ne abonibo abaria Nyasaye.

Enywe abasubila, mwalachilwa okhurunga Qisasi khubalia bererwe, omulekhule khumulekhule, omusumba khumusumba, ne omukhasi khu mukhasi, ne uleshelwa nende owashie shiosishiosi kho alondwekho omuhe khubulayi, naye arunge obulayi, okho ni okhwanguyihisibwa okhurula khu Nyasaye wenyu omulesi. Ne ularuma eshichelo nikhwakhamala kano, alaba nende eshinyasio eshilulu.

Mulaba nende obulamu obulayi khukhurungana likhobo (Qisasi,) enywe abobwongo khomunyoole okhuria.

Mwalachilwa- mulala wenyu lifwa nilimuulila nalekha omwandu, alekhe obulache khubeebusi nende khubeekho munjila indayi ichamisia, Kano kalachilwa khubaria Nyasaye.

Ne ulia ulakalukhasia obulache namalile okhuwulila, tsimbi tsilaba khubalia bakalukhasinjia, toto Nyasaye ni umuwulili omumanyi muno.

Ne ulia uririla omulachi okhukora, nohomba okhunyoola tsimbi, mana narera omulembe hakari wabu, shalaba nende tsimbi tawe, toto Nyasaye niwobulesheli muno Owobukoosia.

Enywe abasubila, mwalachilwa akhufunga (saumu) shingala balia abali imbeli wenyu balachilwa, kho munyoole okhuria Nyasaye.

Tsinyanga tsibalikha butswa, ne owuli omulwale mwinywe nohomba owuli khuluchendo abalilile tsinyanga tsindi. Nebalia abanyala, barusie (Fidia) balisie ebilibwa abamanani, ne ukhola obulayi khulwokhwirusilia obo ni obulayi khuye, Ne nimufunga ni obulayi khwinywe, nimuba mbu mumanya.

Omwesi kwa Ramadhani ni kwe yi Qurani yeshibwamo okhuba ni obulunjifu khu bandu, nende ebifune bwahabulafu obulunjifu khubandu nende obukabukhasio. Kho ulia mwinywe womwesi oko kumunyoola afunge, Ne uli omulwale nohomba uli khuluchendo abalilile tsinyanga tsindi, Nyasaye abenyelanga obwangu, ne shabenyelanga obusiro tawe, Ne mumale tsinyanga tsibalwa etso ne mwitsomie Nyasaye khu kayabalunjilisia, muba murio khomwanyola okhupa orio.

Ne abasumba banje nibakhureeba(ukhulondokhanainasi) esie, (baboolele) esie endi ahambii, ewulilanga amasayo komusabi niyasaba, kho bafuchilile mana basuubile esie, khobanyoole okhulunjikha.

Mufuchililwa eshilo shokhufunga, okhwinjililana nende abakhasi benyu, bo ni eshifwalo shienyu nenyu muli eshifwalo shiabu, Nyasaye amanyile mbu mubelenge nimwifwinya mumioyo chenyu, mana abachamile amasayo kenyu mana namuleshela, bulano mubabaasie ne mukonye shia Nyasaye yabahandichila, Ne mulie ne munywe okhula shinga mulola obulafu bwomumabwibwi okhurula khubumali bweshilo, mana mumalisie okhufunga okhula eshilo, ne mulababaasia nimuli mumusikiti tawe (itikafu), olo ni olwakho lwa Nyasaye mulasita ahambii nalo tawe, Endio nilwa Nyasaye aretsanga habulafu ibimanyisio bibiye khubandu kho banyoole okhumuria.

Ne mulalia emiandu chienyu abeene khubeene mubulianga tawe, nende okhuchiyila khubaami khomunyoole okhulia ebuleka we emiandu chiabandu mutsimbi, nanyuu nimulimbu mumanyile.

Bakhurebanga okhulondakhana nende emiyesi, boola “Ebo ni ebichelo biebisee shichila abandu bahajji” Ne shinobulayi okhwinjila munzu okhuburira inyuma tawe. Halali obulayi ni ulia uria Nyasaye, ne injile mutsinzu okhuburira mumuliango. Ne murie Nyasaye khomunyoole okhubura.

Ne mulwane khunjila ya Nyasaye balia babalwaninjia, ne mulaburira eshichelo tawe, toto Nyasaye shiyachama abandu babuririranga eshichelo tawe.

Ne mubeere wosiwosi amubanyoola, nebatafie shinga boosi babatafinjia, ne inzoka ni imbii muno okhushila okhwira. Ne mulalwana ninabo mumisikiti kwoluyali okhuula bobachake okhubalwaniliamwo. Ne nibachaka okhubopelamwo mwesi mubakhupe. Ne endio nilwakuli omurungo kwabakhayi.

Ne nibalekha (nobulayi) toto Nyasaye nomunji Owobulesheli Owobukoosia.

Nemukhupane ninabo okhuula inzoka ibuleo, ne idini ibe ya Nyasaye butswa, nenibalekha obusuku bulabao tawe halali khubalia bakhukhola obubii.

Omwesi omutakatifu khumwesi omutakatifu, ne ebindu ebitakatifu biarebwakho likhobo(Qisasi), kho owubaseera nende emielo mwesi mubakhuye shinga babakhuyile, Ne murie Nyasaye, ne mumanye mbu Nyasaye ali halala nende abamuria.

Ne murusie (emiandu) khunjila ya Nyasaye, ne muleyinjisia nemikhono chienyu mubusishi tawe, ne khole amalayi, toto Nyasaye yachama abakholanga amalayi.

Ne mukhole Hajj nende Umra (oluchendo lwokhutsia Makkah) shichila Nyasaye, ne nimwikalilwa murusie eshihanwa shamunyala shimwanguyile, ne mulabeka emirwe chienyu tawe okhula eshihanwa shiule habandu ashikhoyele okhuba. Kho ulia uli omulwale mwinywe nohomba awumiye khumurwe kukwe, naye arunje khulwokhufunga nohomba okhurusia ishihanwa nohomba eshisinzwa, ne nimulaba obulayi, kho yesiyesi wisangasia khulwokhukhola umra- kho ahije – awo asinze ishisinzwa shimwangunyila okhunyoola. Ne owula nyoola ofunge tsinyanga tsitaru, nali muhijja nende tsinyanga saba nimwakhakalukha, etso ni tsinyanga ekhumi abwene. Ako ni khulwa ulia owabandu baye shibali ahami nende omusikiti omutakatifu tawe. Ne murie Nyasaye ne mumanye mbu Nyasaye ni omululu wokhuhana eshinyasio.

Hijja ni imiesi emilobole, kho ulia ulachilwa okhukhola hijja mumiesi echo alaboola amakhuwa amabii tawe, nohomba alakhola ebikhole ebibii tawe, ne alayingana mu haji tawe. Ne liosi lwosi lilayi liamukhola Nyasaye alimanyile, ne mwikasilie emikabo emilayi ne emikabo emilayi ni okhuria Nyasaye, ne murie esie enywe abandu bobwongo.

Shinobubii khwinywe tawe okhukoonya tsimbabaasi tsia Nyasaye wenyu omulesi, ne olwa mwitsa okhuba nimuyombokha okhurula Arafat murumbule Nyasaye mutsimbeka tsioluyali, Mumurumbule shinga yabalunjisia, shingala mwali inyuma awo mubandu bakora.

Mana muyombookhe okhurula awo shingala abandu bayombokhanga boosi, nemusabe eshileshelo Nyasaye, toto Nyasaye ni Omulesheli Owobukoosia.

Ne nimumala okhukhola imilukha chienyu, Awo murumbule Nyasaye shingala mwarumbulanga baseenywe nohomba murumbule okhushilakho hao, ne mubandu baliwo baboolanga mbu: “Nyasaye khwuhelesie amalayi khushialo” ne mwikulu (Akhera) babulayo omukabo kwosikwosi.

Ne mubo balowo baboolanga mbu “Nyasaye khuhelesie khushialo amalayi ne akhera okhuhelesie amalayi ne okhulinde okhurulana nende eshinyaasio shiomulilo.

Abo bali nende omukabo khukabakholanga, ne Nyasaye ni omwangu wokhubala.

Ne murumbule Nyasaye mutsinyanga etso tsibalikha, ne wiyanguyilisia mutsinyanga tsibili, (nakalukha) hao abula tsimbi tawe. Ne ulia witsa okhushinda yesi abula tsimbi khu ulia uria Nyasaye. Ne murie Nyasaye na mumanye mbu mulikhung’asia ewuwe.

Ne mubandu baliho bamakhuwa kabu kakhusangasinjia khushialo. Nabo bakholanga Nyasaye okhuba omuloli khukali mumioyo chiabu, nabo nibali abasolani abakhongo muno.

Ne nibarula, basalaana khushialo okhukhola obutobela (amabii) okhusishia emimela nende emioyo. Ne Nyasaye shiyachama abamabii tawe.

Ne nibaboolelwa mbu; “Murie Nyasaye” obukhongo bwabu bubabukula okhukhola amabii. Kho Jahanaam niyo ilibayela, nao ni habundu abii muno.

Ne mubandu baliwo bakusinjia emioyo chabu khulwokhwenya obuchami bwa Nyasaye, ne Nyasaye ni Omuholo (omuloonga) khubasumba bebe.

Enywe abasubili injiile mubusalamu nebilenje biosi, ne mulalonda amasenelo kashetani tawe, toto ye ni omusuku wenyu owabulafu.

Ne nimurerekha obifune bia habwene nibimalile okhuboolela, kho manye mbu Nyasaye niwa amani Owamachesi muno.

Khuli nende elindi liabalindanga halali Nyasaye okhubetsela nende abinikha biamaleesi, nende abamalalika, mana amakhuwa kabusibwe, ne ewa Nyasaye namakhuwa koosi kalikalusibwa.

Reba olwibulo lwa Israili, Ni ebimanyisio biefu binga biahabulafu biakhwabarumila? Ne ukalukhaninjia tsimbabaasi tsia Nyasaye nitsimalile okhumwitsila, toto Nyasaye ni omululu weshinyasio.

Abakhayi baronelwa obulamu bwokhushialo ne batseshelelanga abasuubili, ne abaritsanga Nyasaye baliba hekulu wabu inyanga yeyindukho, ne Nyasaye akabanga wayenya bulali nende shichelo.

Abandu boosi bali be idini ndala, (yayetsa ninayo Adam) (Mana nibakabukahana) mana Nyasaye narera abarumwa abareranga amacheni amalayi nende okhwikanyilisia, mana- nabeshelia halala ninabo ebitabu khubwatoto bikabule abandu akabawukhanamwo, Ne shibawukhana khwako halali abahebwa ebitabu ebo- abwatoto nibwakhamala okhubeetsela shichila ishinda hakari wabu, mana Nyasaye nalunjisia balia basuubila khukalia akabawukhanamwo khubunyali bubwe, Ne Nyasaye alunjisinjia wayenya khunjila ingololofu.

Nohomba mparanga mbu mulinjila mwikulu nikashili okhuboolela ngakolela balia abali inyuma wenyu? Banyolwa nende obutinyu nende amaraba mana nibaresibwa muno, Omurumwa nende abaasubila ninaye nibaboola mbu “ubahabini bwa Nyasaye nibuule lina? Mumanye mbu abuhabini bwa Nyasaye buli hambi.

Bakhureebanga mbu nishina shabarusia? Boola; “shiosi shiosi shiamurusia mubulayi muhelesie abebusi nende abekho nende abaana abafwilwa nende abamanani nende balia bali khuluchendo (abananjila), Ne amalayi kosikosi kamukhola Nyasaye akamanyile muno.

Mwalomesibwa okhulwana liyie, (okhulwa idini) nalo nilikhuwa lisiro khwenywe, ne munyala okhukhaya eshindu nasho nishili eshilayi khwinywe, ne munyala okhuchama eshindu nasho ni eshibi khwenywe, ne Nyasaye numanyile ne enywe simumanyile tawe.

Bakhurebanga okhulwana mumwesi omutakatifu, boola; “okhulwana mumiesi omutakatifu ni amabii amakhongo, ne akhwikalila abandu khudini ya Nyasaye nende okhukhaya Nyasaye, nende okhwikalila abandu khu musikiti omutakatifu oko, nende okhurusiamo abandu balimo ni obwononi obukhongo imbeli wo Nyasaye. Ne okhwikalila abandu khu dini yabu nobubi muno okhushila okhwira, Ne sibalalekha okhulwana ninanyuu okhula babarusie khudini yenyu, nikali mbu banyala, Ne balilekha idini yabu mwenywe, mana bafwa nibali abakhayi, Abo nibo bebikhole biabu biabiyibwa khushialo nende mwikulu. Ne abo nibo abandu bomumulilo, balimenyamo tsinyanga tsiosi.

Toto balia basubila nende balia bawuya mana nibalwana khunjila ya Nyasaye, abo balindanga tsimbabaasi tsia Nyasaye, ne Nyasaye Nomulesheli owobukoosia.

Bakhurebanga amalwa nende okhubaya isimbi, Boola mbu; “khulimo nende obubi obukhongo nende obukhonyi khubandu, ne obubi bwabio nobukhongo muno okhushila obukhonyi bwabio. Ne bakhurebanga mbu nishina shiabarusia? Boola; “eshiburirire” endio nilwa Nyasaye amufunulila tsinyali tsitsie kho munyoole okhupara.

Khushialo nende mwikulu, ne bakhurebanga okhulondokhana nende abaana abafwilwa, boola “okhubakholela amalayi nobulayi, ne nibubasasia halala ninanyu nga abakhali abaana benyu, Ne Nyasaye yamanya muno owobutobela nende omukholi wamalayi, ne Nyasaye yenyanga yakharerere mubusinjifu, toto Nyasaye niwaamani owamachesi po.

Ne mulateshia abakhasi batsokasinjia Nyasaye okhula basuubile, ne omusumba omukhasi omusuubili ni omulayi okhushila ulia utsokasinjia Nyasaye kata nabaloleshela okhuba – omulayi. Ne mulabakha abakhana benyu khu basatsa abatsokaninjia Nyasaye okhula basubile,Ne- omusumba – omusuubili ni omulayi okhushila owutsokasinjia Nyasaye kata nabaloleshela omulayi. Abo balanganga abandu khunjila yomulilo, ne Nyasaye alanganga khunjila yomwikulu nende obulesheli khukhuchama khukhwe. Naye aretsanga habulafu tsinyali tsistsie khubandu khobanyoole okhwitsulila.

Nebakhureebanga okhulondokhana nende okhuswamila. Baboolele mbu “esho ni eshisinyo, kho mube ehale ninabo nibali mukhuswamila, ne mulabaninabo tawe okhula shinga batswenukha, nibakhalafuya mubenjilile shingala Nyasaye yabalomesia. Toto Nyasaye yachama abasabanga eshileshelo ne yachama abetswenukhu.

Abakhasi benyu ni tsindalo tsienyu, kho mwinjilile mutsindalo tsienyu shingala mwenya, Ne ranjilisilie amalayi emioyo chenyu, ne murie Nyasaye ne manye mbu toto enywe mulibukana ninaye, ne subisia abasubili.

Ne mulakhola elira lia Nyasaye khubitsubo bienyu okhuba eshiburiro shokhukhaya okhukhola amalayi nende okhuria Nyasaye, nende okhulimasia abandu, ne Nyasaye nowokhuwulila muno omumanyi po.

Nyasaye sababukulilanga khubitsubo bwenyu bieshikhaya ebo tawe. Halali ababukulilanga khu kemioyo chienyu chikhola. Ne Nyasaye ni omulesheli muno omuholo po.

Ne betsubanga mbu balaba ehale nabakhasi babu, balinde emiesi chine, ne nibakalukha - toto Nyasaye nomulesheli muno owabukoosia.

Ne nibachoma okhubalekha, toto Nyasaye nomuwulili muno omumanyi muno.

Ne abakhasi baleshelwe balinde okhula amaswamila kataru. Nesibachamilwa okhufisa shia- Nyasaye yalonga mutsimbeleshelo tsiabu tawe - Nibali mbu basubila mu Nyasaye nende inyanga yeyindukho, Ne abasatsa babu bali nende obuchami bwokhubakalusia nibenya okhukasia omulembe, Nabo abakhasi bali nende ebilachilo shinga balachilwa mumalako. Ne abasatsa balikho hekulu wabu okhubashila, Ne Nyasaye niwa amaani muno owamachesi po.

Okhulekhwa nikhabilisa, Mana hao ni okhwikhala khubulayi nohomba okhulekhana khubulayi, Nesimufuchililwa okhubukula shiosi shiosi eshia mwahelesia abakhasi benyu, ilali bosi babili nibaria mbu sibalanyala okhulinda olwakho lwa Nyasaye tawe, kho nimuria mbu sibalalinda olwakho lwa Nyasaye tawe hawo obutulani bubulao nikali mbu omukhasi alenunula. Etso nitsio tsinzakho tsia Nyasaye kho mulatsiruma tawe. Na balia baruma tsinzakho tsia Nyasaye aba nibo bamabii.

Ne namulekha okhulekha khwa khataru, safuchililwa okhumukalusia tawe okhula ateshele omusatsa wundi, ne omusatsa oyo nomulekha owo obubii bubulao nibenya okhumukalukhakho, nibalola mbu balalinda tsinzakho tsia Nyasaye, ne tsino nitsinzakho tsia Nyasaye etsia yenosilinjia abandu bamanyile.

Ne nimulekha abakhasi mana nibamala tsinyanga tsiabu tsiabalachilwa, mubakalusie khubulayi nohomba mubaleshe khubulayi. Ne mulabakalusia okhubawumisia khubusuku tawe. Ne ulakhola ario alaba yekholele obubii omwene- ne mulabukulila tsinyaali tsia Nyasaye okhuba omubayo tawe. Ne yitsulile tsimbabaasi tsia Nyasaye khwenywe, nende shiayabeshilia okhurula mushitabu, nende amachesi kandi akabachelelanga mushio. Ne murie Nyasaye na mumanye mbu toto Nyasaye ni omumanyi wabuli eshindu.

Ne olwamulalekha abakhasi ne nibamala indukho yabu mulabekalila okhutekha khubatsa babu nikali mbu banyolane khubulayi , kano yekanyilisibwa khuko ulia owasubila Nyasaye nende inyanga yeyindukho, kano ni amalayi khwenywe ne amalafu muno Ne Nyasaye amanyile halali enywe mukorerwe.

Ne abakhasi bebule banunie abaana babu emika chibili imilamba, khu ulia wenya okhumalisia okhununia. Ne samwana omwana arusie eshilibwa shia Nyinammwana nende omwana, nende tsingubo mubulayi, Ne omundu shanichilisibungwa halali khu shiobunyali bubwe. Ne mama alarebwa khubusandi shichila omwana wuwe tawe, nohomba baba alasandibwa shichila omwana wuwe tawe, Ne “Omuchelami” yesi ali ario. Ne boosi babili nibenya okhuleshesia okhununia nibafuchilisaniye awo obubii bubulao. Nimwenya okhuhelesia abaana benyu omukhasi wokhubanunia hao shibulaba obubii kwinywe tawe nimurusia eshia mwalaka shingala mwanala, ne murie Nyasaye, ne mumanye mbu Nyasaye alolonga koosi kamukholanga.

Ne balia mwinywe bafwitsanga nibalekha abakhasi, abakhasi abo bamenye emiesi chine, nende tsinyanga ekhumi. Ne nibamala tsinyanga tsiabu etso, obubii bubulao khubo nibekholela amakhuwa kabu khubulayi. Na Nyasaye akamanyile koosi kamukholanga.

Obubii bubulao okhuyila eshiselelo khukhumanyisia sa khubakhasi balimu mukhulinda (Eda), nohomba mwafisasa nimusuubile mumioyo chienyu, Nyasaye amanyile mbu enywe mwitsa okhubetsulila, Halali mulabakalushila mwibifisi tawe halali moboole amakhuwa amalayi ne mulabateshia tawe okhuula bamale indukho yabu (eda). Ne mumanye mbu Nyasaye amanyile kali mumioyo chienyu, kho mube meso ninaye. Ne mumanye mbu Nyasaye ni omeleshili omuholo muno.

Ne obubii bubulao khwinywe tawe nimulekha abakhasi bamushili okhuba ninabo nohomba bamushili okhubahelesia omurungo kwabu. Halali mubahelesie shiokhubahotselesia, uli nende obunyali shinga anyalilwa ne wobunyakhani shinga anyalilwa, eshihotselesio okhulondokhana shinga emilukha chiboola, ni obwatoto khubakholi bamalayi.

Ne nimubalekha nimushili okhubaninabo, ne nimumalile okhubakasilia omurungo kwabu (mahari) kumanyikhe, mana hao mubahelesie inusu yomurungo kamurechelesaniye, halali abakhasi bene nibaleshela, nohomba omusatsa ulia uli nende obunyali bwobuteshiani – bwa nikkah –abe nabaleshele, ne ukhuleshelana nikho khuretsanga omundu ahambi nende okhuria Nyasaye, ne mulebilila okhukholelana obulayi hakari wenyu tawe, toto Nyasaye alolanga kamukholanga.

Mulinde iswala – ne okhushila muno iswala yahakari, ne mulunjishile Nyasaye nimwihotselesie nimulamanga.

Ne nimuba mbu murire mulame nimuchendanga nohomba nimuninile, Ne olwa mulaba nende omulembe mwitsulile Nyasaye shingala yabechesia akamwalali nimwamanya tawe.

Ne balia bafwitsanga mwenywe nibalekha abakhasi, balamile abatonyele abakhasi abo okhunyola obukhonyi omwika omulamba nibalarusibwa mutsinzu tsiabu tawe, Ne abakhasi bene nibarula, awo mubula obubii tawe khu kabekholele abene okhulondokhana nende amalako. Ne Nyasaye niwa amani muno owamachesi po.

Ne abakhasi baleshelwe (nende, Talaka) bahebwe shokhubahotselesia okhulondokhana nende amalako, Ne ako ni amalachilo khubalia abaria Nyasaye.

Ne endio nilwa Nyasaye abafimbulilanga tsinyaali tsitsie khomunyoole okhumanya.

Shiwalola biala barula mutsingo tsiabu nibali mutsiyelefu, nibarire lifwa? Nyasaye nababoolela mbu: “fwe!” mana nabalamusia, toto Nyasaye niwetsimbabaasi khubandu, halali abandu abanji shibopanga orio tawe.

Ni mulwane khunjila ya Nyasaye, ne mumanye mbu toto Nyasaye ni omuhulili omumanyi po.

Ni wina witsa okhwiwosia Nyasaye omwiwosio omulayi kho amumetele eshimeto eshinji, Ne Nyasaye ufumbanga khandi abambulanga, Ne ewuwe niyo amulikalusibwa.

Shiwabalola abaandu abakhongo mubaana ba Israili, Musa niyakharulao, olwababoolela omurumwa wabu mbu; “khurerekho omwami kho khulwane khunjila ya Nyasaye” Noboola “koo kalaba mbu nimulomesibwa okhupana mulakhaya?” Nibaboola mbu “bilaba birie khulalwana khunjila ya Nyasaye tawe, ne khulondelwe mutsingo tsiefu nende abana befu? Halali olwa balachilwa okhulwana bakalukhana, halali batiti mubo, Ne Nyasaye yamanya abamabii.

Omurumwa wabu nababoolela mbu; “Nyasaye abawulile Taluti (Sauli) okhuba omwami” Nibaboola; alaba arie omwami wefu ne efwe nifwe khukhoyeshele okhunyoola obwami okhushila ye, ne shiyahebwa omwandu tawe,” Naboola mbu: “Nyasaye amalile okhubawulila ye, ne amumetele amachesi nende omubili. Ne Nyasaye ahelesinjia owayenya obwami. Ne Nyasaye ni omuyinda owamachesi po.

Ne omurumwa wabu nababoolela mbu; “Ne toto eshimanyisio shiobwami bubwe ni okhubarerera lisanduku lilimwo eshiosia emioyo chienyu, eshirulanga khu Nyasaye wenyu omulesi, ni khulimwo nende akababu Musa balekha nende Harun, Abamalaika balichinganga. Toto mukano ebimanyisio bilimwo khwinywe nimuli mbu mwasuubila.

Kho olwa Talut yarula nende omukanda kweliyie yaboola mbu “Nyasaye alabahelesia amatemo komwalo, ulanywa mumwalo oko salaba ninasi tawe, na ulanywamo tawe alaba ninasi ilali ulia witsa ulataya neshikalabo shomukhono kukwe, Halali boosi banywamo ilali batiti mubo. Olwa yambukha omwalo ye nende balia basubila halala ninaye baboola mbu; “lelo sikhulanyala Jaluti nende omukanda kukwe tawe” ne balia bali nende obwatoto bwokhubukanana nende Nyasaye wabu nibaboola mbu “Emikanda chinga emititi chishilanga emikanda emikhongo khubunyali bwa – Nyasaye. “Ne Nyasaye ali halala nende abefwilanga.

Ne olwabarula okhuchaka okhulwana nende Jaluti nende omukanda kukwe baboola mbu; “Nyasaye wefu omulesi, ukhuhelesie okhwifwila, ne otinyisie ebilenje biefu, ne okhukhonye khushile abandu abakhayi.

Khubunyali bwa Nyasaye nibabashila, mana Dawuudi niyeera Jaluti, mana Nyasaye nahelesia Dawudi obwami nende amachesi, mana namwechelesia akayenya. Ne Nyasaye abetsanga mbu siyekalilanga abandu khubandi tawe hawo eshialo shiakhabiyile, halali Nyasaye niwetsibambaasi khubili khushialo bioosi.

Tsino ni tsinyali tsa Nyasaye, khukhusomelanga khubwatoto ne toto ewe oli mubarumwa.

Abarumwa abo khwaminia abaandi okhushila abandi mubo. Mubo baliwo balomaloma nende Nyasaye, ne abandi nabaninia hekulu, ne nikhuwa Isah omwana wa Mariamu ebifune bili habulafu, Ne nikhumuramo amaani ka roho omutakatifu, Ne Nyasaye yenyanga shibakhayingane balia abali inyuma wabu ebifune bili habulafu nibiakhabetsela. Halali bakabukhanamo. Mubo balimo abasuubila, ne abandi mubo abakhaya, Ne Nyasaye yenyanga shibakhayingane tawe. Halali Nyasaye akholanga nga yenya.

Enywe abasubila, rusie khubilia ebiakhubakabile, inyanga yeyinganga okhuwa nishili okhubolela, nohomba obwitsa nohomba ukhusabilwa. Ne abakhayi nibo abamabii.

Nyasaye – Abulao Nyasaye owulali ye tawe omulamu, owemelanga amakhuwa koosi buli lwoosi, sharengetsanga nohomba shakonanga tawe, nibibie biosi yenyene bili mwikulu nende khushialo, niwina oyo unyala ukhusabila imbeli wuwe halali khukhuchama khukhwe? Amanyile kali imbeli wabu nende inyuma wabu, Nabo shibamanyile shiosishiosi mubumanyi bubwe tawe halali okhuula yenye omwene. Obunyali bubwe bwasalaana mwikulu nende khushialo, ne sashilungwa okhubilinda tawe, Naye niye uli hekulu omukhongo muno.

Okhunichilisania khubulao mudini, obulunjifu bumalile okhwaukhana nende obukori, kho ulia ukhaya shetani mana asubile Nyasaye, oyo toto alaba atilile eshitililo shiamani, eshilafunikha tawe, ne Nyasaye niwokhuwulila omumanyi po.

Nyasaye nomulindi wabalia abasubila, abarusinjia mushilima nende okhwubenjisia mubulafu, Halali balia abakhaya abalindi babu ni amashetani. Kabarusinjia mubulafu nikabenjisia mushiliima. Abo nibo abandu bomumulilo, balimenyamo tsinyanga tsiosi.

Shiwalola ulia wayingasia Ibareem khu Nyasaye wuwe omulesi, shichila Nyasaye yamwelesia oburuchi(obwami). Olwa Ibraheem yaboola mbu; “ Nyasaye wanje ni ulia uhelesinjia obulamu mana khandi abubukula (afwisia)” Naye naboola mbu; “Esie siesi ehananga obulamu khandi efwisinjia”Ibraheem naboola mbu; Nyasaye arusinjia eliuba okhurula ebukwe nawe lirusiliekho mumbo” Mana nakhaywa. Ne Nyasaye shalunjisinjia abandu abamabii tawe.

Nohomba shinga ulia wabura khulukongo olwamala okhuba amakubili, mana naboola mbu; “Nyasaye alilamusia arie olukongo luno ngala lwamala okhufwa luri ?” Mana Nyasaye namufwisa ye omwene khumika imia ndala. Mana namulamusia, Ne namureeba mbu “Koo wikhale ebise biyela birie nofwile? Mana nakalusia mbu; “Awundi endi nga wikhale inyanga ndala nohomba ebise bieyinyanga.” Nyasaye namuboolela “wikhale mo emika imia ndala, Hengakho eshilibwa shisho nende ebinywebwa bibio bishili okhubiya. Ne henga isishili yiyio. Ne kho khukhole obe eshimanyisio khubandu henga ebikumba biayo bino, shingala khubichingulanga mana shinga khubifwalanga inyama, Mana olwa kamurumbushila yaboola mbu; “emanyile mbu Nyasaye ni omunyali wabuli eshindu”.

Ne olwa Ibraheem yabola mbu; Nyasaye nzechesia shingala olilamusia abafuu” Nyasaye namureba mbu; “oshili okhusubila?” Nobola mbu; “Ndasubila halali ndenya omwoyo kwanje kutinye” Namubolela mbu; “bukula amayoni kane ne okanasie ewuwo, mana okatonyetonye ne ore buli khushikulu eshitonye sheliyoni - mana akalanje koosi kalakhwitsila tsimbilo. Ne omanye mbu toto Nyasaye ni owamani khandi owamachesi.

Balia bekhonyelanga emiandu chiabu khunjila ya Nyasaye bali shinga inyuma ndala yirusinjia ebisuche saba, buli eshisuche shili nende tsinyuma imia, Ne Nyasaye emetelangakho wayenya, ne Nyasaye ni omuyinda omumanyi muno.

Balia barusinjia emiandu chiabu khunjila ya Nyasaye mana nibalalondiakho khu shiabahanile esho amaboorolo nohomba amasinyisio, Bali nende omurungo kwabu khu Nyasaye wabu omulesi, ne shibaliba nobuyendi tawe nohomba shibalibeelela tawe.

Amakhuwa amalayi nende, obulesheli ni ebilayi okhushila eshihanwa shilondibungwakho nende ebisinyisio, Ne Nyasaye niye winyala omuholo muno (khubilonje bibie)

Enywe abasubila mulanyasia ebihanwa bienyu khulwa okhuborola nende ebisinyisio tawe, shinga ulia urusinjia omwandu kukwe okhulolosia abandu ne sasubilanga Nyasaye nende Inyanga yeyindukho tawe, okhufwana khwe khulishinga olwanda lulikho olufu, mana nilukhupwa nende ifula yolucheka, nilulekha olukhaya, mana sibaliba nobunyali bwosi bwosi khukabachuma tawe, Ne Nyasaye salunjisinjia abandu abakhayi tawe.

Ne balia barusinjia omwandu kwabu khulwokhukonya obuchami bwa Nyasaye nende okhuhelesia emioyo chiabu amani bali shinga omukunda kuli hekulu, mana ifula yolucheka nikwamo, mana nikurusia ebiamo biakwo nibimeteshe. Nekata nikuloolelwa nende olucheka tawe ifula inditisa ikunyililila. Ne Nyasaye alolanga kamukholanga.

Koo aliwo mwenywe wenya okhuba nende omukunda kwetsitende, nende emizabibu, okubururangamo omwalo, ne anyolangamo ebiamo bietsimbia tsiosi. Mana obukofu bumulile naye nali nende abaana abatiti, mana omukunda oko kukhupwe nende imbumbuyeka yomulilo mana nikuyia, Endio nilwa Nyasaye abachesilinjia ebimanyisio khomunyoole okhupara.

Enywe abasuubila, rusie khubilayi biamunyoolele nende ebiakhubarusiliye mumikanda. Ne mulaba nende liparo liokhuasasia ebibi tawe, ni mubetsanga abeene shimwakhabibukula tawe halali nimufunikhwe tsimoni, Ne mumanye mbu Nyasaye niomuyinda owoluyali.

Shetani abaretsangamo oburi bwobumanani, ne abalomesinjia okhukhola eshifwabi, naye Nyasaye abalaka eshileshelo nende tsimbabaasi tsirula ewuwe, Ne Nyasaye ni wobuyinda obunji omumanyi muno.

Ehelesinjia amachesi owayenya ne uhelesibwa amachesi toto aba ahelesibwa obulayi obunji. Ne sibetsulilanga tawe ilali abandu bobwongo.

Ne shiosi shiosi shiamuyinia noho shiamulaka okhuyinia toto Nyasaye ashimanyile ne balia abakholi bamabi balibula ulibahabina.

Ne nimulolosia ebihanwa nobulayi, ne nimuchisa mwahelesia abatakha mumasirisi obo ni obulayi khwinywe, Ne bitsa okhubarusialiaho tsimbi tsienyu tsindi. Ne Nyasaye amanyile muno amakhuwa koosi kamukholanga.

Okhulunjikha khwabu shikhuli khwiwe tawe, halali Nyasaye alunjisinjia wayenya, Ne shiosi shiosi shiamuyinia khubulayi ni eshienyu abeene. Ne mulayinia halali khulwokhwenya/omuchami bwa Nyasaye, Ne shiosi shiosi shiamurusia khubulayi mulirungwa mubwitsufu, ne shimulikhobwa tawe.

Ne oyelesie abatakha balia bekalilwa khunjila ya Nyasaye abalanyala okhusamula khushialo okhukhaba omukabo tawe. Ne ulamanyile aparanga mbu ni abayinda shichila okhwiyikalila khwabu nende okhusaba. olabamanya khubimanyisio biabu. Shibayuyushilanga akhusaba abandu tawe, Ne amalayi kosikosi kamurusia toto Nyasaye akamanyile muno.

Balia barusinjia omwandu kwabu eshilo nende eshitere, mubwifisi nende mubulafu Bali nende omurungo kwabu ewa Nyasaye wabu nesibaliba nende obunyendi tawe, nesibalibelela tawe.

Balia balitsanga Riba sibasinjila ilali shinga asinjilanga utililwe nende shetani. Ako nilwokhuba mbu babola mbu; iganga ili shinga Riba’ Halali Nyasaye achamila inganga ne akana riba. Kho ulia ulilwe nende amachelo okhurula khu Nyasaye wuwe omulesi, mana niyeyikalila, oyo akeke kali mukabura, na amakhuwa kaye kali khu-Nyasaye. Ne balia bachamanga riba abo nibo abandu bomulilo, balimenyamo tsinyanga tsiosi.

Nyasaye arusinjia muribaa tsimbabaasi, ne ametenga tsimbabaasi khubihanwa, ne Nyasaye shiyachama buli omukhayi omwetsimbi tawe.

Toto balia abasubila mana nibakhola amalayi mana nibalumilila okhulama mana nibarusia eshihanwa (izakaa), bali nende omurungo kwabu khu Nyasaye ne balibula obuyendi neshibalibelela tawe.

Enywe abasuubila rie Nyasaye wenyu ne muleshe ribaa tsitonyele, toto nimuli abasuubili.

Ne nimulakhola murio tawe mwikasie khuliyie okhulwana nende Nyasaye nende omurumwa wuwe. Ne nimusaba eshileshelo ne omurwe kwo omwandu oko ni okwenyu, Mulakholela abandu obubii tawe nanyu mulakholelwa tawe

Ne nikali mbu ubanzungwa ali nende obutinyu awo omubanzi alinde okhula onyoole obwangu. Ne nimukhola likofi okhuba ishihanwa awo ni obulayi kwinywe nimuba mbu mumanya.

Ne murie inyanga yamulikalusibwa khu Nyasaye, mana buli shiamundu alirungwa akayakhola, nabo sibalikholela yesiyesi obubi tawe.

Enywe abasubili nimubanzana likofi okhula ebise biarebwao, mwandike. Ne ahandika yandike hakari wenyu khubulunjifu, na uhandika alakhaya okhwandika tawe, Ahandiche shingala Nyasaye yamwechesia. Ne welikofi ubanzwa yandike; ne arie Nyasaye omulesi wuwe, ne alaleemia shiosi shiosi tawe, Ne ubanzwa nali omundu watangala nohomba omuteshele nohomba sanyala ukhwandika omwene, hawo omulindi wuwe yandike mubulunjifu.Ne mumanyie abaloli babili beshisatsa mwenywe. Ne abasatsa nibalonyolekhana tawe, abe omusatsa mulala nende abakhasi babili, khubalia bamuchamila okhuba abaloli, kho mulala wabu nakorana owundi amwitsulisie.Ne abaloli balakhaya nibalangwa tawe, Ni mulakhaya okhwandika likofi nilili lititi nohomba likhongo ukhula ebise bialio tawe. Obo nibo abwatoto muno imbeli wa Nyasaye, ni abwene muno khubuloli, na ni obulayi muno mulaba nende ubukanakani tawe. Habula nili inganga yo mukhono khu mukhono hakari wenyu, mana awo sinobubi kwenywe nimulahandika tawe, alali nimukusania mureo abaloli. Ne omuhandichi nohomba omuloli alarebwa mubutinyu tawe. Ne nimukhola murio toto elo nilikosa khweywe. Nemurie Nyasaye naye yetsa ukhubamanyia, na Nyasaye ni omumanyi wabuli eshindu.

Ne nimuli khuluchendo nimulanyola omuhandichi tawe, biyela okhuhana eshisingwa. Ne mulala wenyu nabishila owashie kho ulia usubilwe akalusie eshia owashie yamuhelesia. Ne arie Nyasaye omulesi wuwe, Ne mulafisa obuloli tawe, ne ulia ulafisa omwoyo kwaye kulaba kurelele amabi. Na Nyasaye ni omumanyi owamachesi khukamukholanga.

Ebili mwikulu nende mushialo nibia Nyasaye biosi. Ni nimura habulafu akali mumioyo chienyu nohomba nimufisa, Nyasaye alibabalila, mana aleshele wayenya ne awelesie eshinyasio wayenya. Ne Nyasaye ni omunyali wa buli eshindu.

Omurumwa yasubila akeshibwa khuye okhurula khu Nyasaye wuwe omulesi,Nende Abasubili boosi basubila Nyasaye nende abamalaika bebe nende ebitabu bibie nende abarumwa bebe, sikhukabukhasinjia hakari wayesiyesi mubarumwa bebe tawe. Ne baboolanga mbu; “khuwulile ne khufichilile, Khukhusaba obulesheli Nyasaye wefu, na uwuwe niwo amakakalushilo kali.

Nyasaye shanichilisinjia omundu yesiyesi halali khushichelo shianyalilwa. Obukhala bwa kayakhola nobubwe, ne okhusikha khwa kayakhola ni okhukhwe, “Nyasaye wefu omulesi olakhubukilila nikhwibilila nohomba nikhukosela tawe, Nyasaye wefu omulesi, olakhutiukha emisiko shinga echawatiukha balia abali imbeli wefu tawe. Nyasaye wefu omulesi olakhutiukha akakhulanyala tawe, ne okhubeele ne okhuleshele ne okhubele tsimbabaasi, Newe omulindi wefu, kho khwelesie obushili khushile omukanda kwabakhayi.