Ali Imran

Alif lam Miim.

Nyasaye, abulao Nyasaye wundi oulaliye tawe, ni omulamu omwemelesi wa koosi tsinyanga tsiosi.

Yakhwishilia eshitabu khubwatoto, eshifuchilisaninjia nende akali imbeli wuwe, Ne yeshia itaurati nende injili.

Inyuma awo, bibe ubulunjifu khubandu, Mana niyeshia ifurqaani(eshikabukhasio) Toto balia abayingasia ibimanyisio bia Nyasaye baliba nende eshinyasio eshilulu. Ne Nyasaye niwa amani muno owokhurunga.

Toto Nyasaye shosi shiosi sishifisanga khuye okhumanya tawe shibe mushialo nohomba mwikulu.

Ye niye obakasinjia mutsinda tsiabanyinenywe shinga yenya, Aumao Nyasaye ulaliye tawe, ni owamani owamachesi muno.

Ye niye owabeshilia eshitabu shino, shilimo nende tsinyali(tsiokhubusia)muhakamat, tsili nende okhumanyisia khuli abulafu, Esho nisho eshisina shieshitabu shino. Ne etsindi tsiliho tsietsinjela. Kho nebalia bomumioyo chiabu chilimo obukori boloondanga tsietsinjelo khulwokhukhaba inzoka, nende okhukhaaba eshifune shiatso, Ne abalao umanyile eshifune shiatsio ilali Nyasaye. Ne balia bali nende amayichikho amasiro mukhumanya, babolanga mbu; khusubile tsiosi tsirula khu Nyasaye wefu omulesi, Ne sibetsulilanga kano tawe ilali balia abamachesi.

Nabo baboolanga mbu; Nyasaye wefu umulesi, olakosia emioyo chiefu nomalile okhuchilunjisia tawe, ne okhuwe tsimbambaasi tsirula ewuwo. Toto newe umuhani.

Nyasaye wefu omulesi, Ewe newe ulikhung’aasia abandu khuyinyanga yibula obukanakani mwo. Toto Nyasaye shafunakanga indakano tawe.

Toto balia bakhaya shibulao shiosishiosi shilibakhonya ewa Nyasaye emiandu chabu nohomba abaana babu tawe, ne abo nibo tsikhwi tsiomumulilo.

Shinga kalia kanyoola abandu bafirauni nende balia bali imbeli wabu. Bayingana ibimanyisio biefu , mana Nyasaye nabatila khumabii kabu, ne Nyasaye ni weshinyasio eshilulu.

Bolela abakhayi mbu; hambi ano mulashilwa ne mulakhung’asibwa murebwe mumulilo (Jahanam) ne eyo ni eshimenyo eshibi muno.

Toto shali eshimanyisio khwinywe olwa emikanda chibili chabukanana okhulwana. Omukanda mulala nikulwanilanga khunjila ya Nyasaye, ne okundi okwabakhayi, nikubalola abanji muno okhushila bo mara khabili, khulwo khubalola netsimoni. Ne Nyasaye yonganga omukhono owayenya khu buhabini bubwe, Toto mukano khuli nende emeeko khubandu betsimoni.

Abandu baronelwa okhuchama obwikombi bwa bakhasi , nende abana abasiani, nende amabunjikho ke idhahabu nende ifedha, nende tsifarasi nende emiruko, nende tsindalo. Oko ni omwikhoyo kwo bulamu bwokhushialo. Ne ewa Nyasaye niko amakalushilo amalayi.

Boola; “ebabolelekho amalayi okhushila ako? Khubaria Nyasaye bali nende emikunda ewa Nyasaye wabu echiburanga hakari wachio emialo. Balimenyamo tsinyanga tsiosi, nende abakhaye abatswenulwa, ne bali nende obuchami bwa Nyasaye, Ne Nyasaye alolanga abasumba bebe.

Balia babolanga mbu, Nyasaye wefu omulesi efwe khusubile, kho khuleshele ebionono biefu ne okhulinde okhurulana nende eshinyasio shiomulilo.

Abefwilanga ababolanga abwatoto abehothelefu nende barusinjia eshihanwa,nende basabanga eshileshelo mumabwibwi.

Nyasaye nende abamalaika nende abamachesi bemelele obwatoto, barusinjia obuloli mbu abulao Nyasaye ilali ye, niye wemelele shilunjikhe, abulao Nyasaye awulali ye, owamani po owamachesi.

Toto idini imbeli wa Nyasaye ni ubuisilamu, Ne balia bahebwa eshitabu sibakabukhanamo tawe ilali obumanyi ni bwa khamala okhubetsela, nende okhubela ishinda yali hakari wabu, Ne ukhaya ebimanyisio bia Nyasaye netoto Nyasaye ni omwangu wokhubala.

Ne nibakhureba bola mbu; “esie ogwisiye obweni bwanje ukhuhenga Nyasaye nende balia abanonda. “ Ne bolela balia bahebwa eshitabu nende timbiti mbu- “Musilimile?” nenibasilimile awo mana bamalile okhulunjikha. Ne nibakhaya, ewe olisa wokhusia uburume, Na ni Nyasaye alolanga muno abasumba bebe.

Toto balia bakhayanga ebimanyisio bia Nyasaye, mana nibera abarumwa khulali khunjila yobwatoto, ne nibera abandu bachelelanga abandu okhukhola amalayi , Toto basubisie eshinyasio eshilulu.

Abo nibo bebikhole biabu biabiya khushialo nende mwikulu, nabo sibalinyoola wokhubahabina tawe.

Solola balia bahebwa elubeka lweshitabu, balangungwa okhwitsila eshitabu shia Nyasaye shinyoole okhubabusilia hakari wabu, ne omukanda mubo kwilukhanga nikushikhayile.

Endio nilwakhubela mbu baboola mbu “omulilo sikulakhutilakho tawe ilali tsinyanga tsinditi butswa.” Mana nikabakatia mudini yabu amakhuwa kabachikhanga.

Ne kaliba karie olwakhulibakhung’asia inyanga ibula obukanakani okhula khwayio, mana buli omundu alirungwa shingala yakholanga, ne sibalikholelwa obibi tawe.

Boola; “Ewe Nyasaye omwene obwami bwoosi, ohelesinjia, obwami wawenya, ne onulanga obwami owawenya, ne onininjia owawenya ne wishinjia wawenya, tsimbabaasi tsiosi tsili mumukhono kukwo, toto ewe oli omunyala wabuli eshindu.”

Ewe winjisinjia eshilo mushitere, newinjilisinjia eshitere mushilo, ne erusinjia omulamu okhurulana khumufu, ne omurusinjia omufuu okhurulana khu uli omulamu. Ne okabilanga wawenya okhubura eshichelo.

Abasubili balakhola abakhayi okhuba abahelwa babu nibalekha abasubili. Ne ukhola ario saliba nende shiosishiosi imbeli wa Nyasaye tawe. Ilali nibili khulwo khwilinda okhurulana nende obusuku bwabu. Ne Nyasaye abekanyilisilia ninaye, Ne ewa Nyasaye niwo amakalushilo.

Boola; nimufisa kali mumioyo chienyu, nohomba nimukara habulafu Nyasaye akamanyile, na amanyile koosi kali mwikulu nende mushialo. Ne Nyasaye nomunyala wabuli eshindu.

Inyanga yabuli omundu alinyoola koosi amalayi kayakhola nikarererwe imbeli wuwe, nende koosi amabii kayakhola. Omundu aliikomba okhuba ehale nende amabii kayakhoola, Ne Nyasaye abekanyisilinjia ninaye. Ne Nyasaye ni omuholo khubasumba baye.

Boola; Nimuli mbu mwayanza Nyasaye nakhamunonde esie, Nyasaye alabachama na yetsa okhubaleshela tsimbii tsienyu, Ne Nyasaye ni omulesheli muno owobukoosia.

Boola; Mulonde Nyasaye nende omurumwa- Ne nibakalukhana – manya mbu toto Nyasaye siyachama abakhayi tawe.

Toto Nyasaye yawula (yalobola) Adam nende Nuh nende ulwibulo lwa Ibraheem nende olwibulo lwa Imran okhushila abandu boosi.

Ni abebulane abene khubene, ne Nyasaye ni omuwulili muno omumanyi po.

Olwa omukhaye wa Imran yaboola mbu; Nyasaye wanje omulesi endakaane ninawe mumwoyo kwanje shilimunda mwanje, Shibe eshishio, kho njamile. Toto ewe newe omuwulili omumanyi muno.

Mana shingalayebula, yaboola mbu; Nyasaye wanje Omulesi esie ndibule weshikhasi, ne Nyasaye amanyile muno shiayebula. Ne weshisatsa shalinga oweshikhasi tawe. Ne esie emukulishe mbu Mariamu. Esie emushinga khwiwe, nende ulwibulo lulwe ,obalinde okhurulana nende shetani owalaamwa (watsubwa.)

Mana Nyasaye wuwe omulesi namuchamila obulayi ne namukhusia okhukhusia okhulayi, ne Zakaria naba omulindi waye. Buli olwa Zakaria yenjilanga mushikoro shiaye yamunyolanga nebiakhulia. Kho namureba; “Ewe Mariam bino orusiye hena?” Mariamu Naboola; “Bino birula khu Nyasaye, toto Nyasaye akabilanga owayenya okhubura eshichelo.”

Awo Zakaria yasaba Nyasaye wuwe omulesi, Naboola mbu: “Nyasaye wanje omulesi umbe okhurula khwiwe olwibulo olulayi. Newe uwulilanga amasayo.”

Olwa yali niyemele nalamanga Mushikoro shishie Malaika namulanga; Toto Nyasaye akhusubisia mbu olebula omwana omukulikhe mbuYahya, witsa okhutinyilisia likhuwa lirula khu Nyasaye, Ne ni omwami omushisila, omurumwa okhurula mubandu abalayi.

Naboola; “Nyasaye wanje omulesi, ndakhanyoola endie omwana nemalile okhukofula endi, ne omukhaye wanje uno ni omukumba?” Naboola; “nilwakali kario Nyasaye akholanga shiayenya.”

Naboola; “Nyasaye wanje omulesi, Mbelesia eshimanyisio” naboola “ishimanyisio shishio ne mbu sholalomaloma nende abandu khutsinyanga tsitaru tawe halali okhuchelasa khwonyene.” Ne omurumbule Nyasaye wuwo umelesi mubuunji ne omwitsoomie ingoloobe nende mumabwibwi.

Ne olwa amalaika yaboola; “Ewe Mariam! Toto Nyasaye akhwawule mana nakhutswenula ne nakhuwa oluyali okhushila abakhasi boosi bokhushialo.”

Ewe Mariam, Wiwotselesie khu Nyasaye wuwo omulesi, ne osikamile Nyasaye wuwo nosujuda neni winama halala nende benamanga.

Kano ni amacheni akefisa akakhukhufunulilanga, ne ewe shiwali ninabo tawe alwa basukunanga tsikalamu tsiabu mbu ni wina mubo witsa okhulela Mariamu. Ne shiwali nabo olwabo baingana tawe.

Olwa Malaika yaboola mbu ; “ ewe Mariamu toto Nyasaye okhusubisia mbu olanyola omwana khulikhuwa lirula ewuwe, Elira lilie ni omubakhwa Isah Omwana wa Mariamu (yesu). Owe shiribwa khushialo nende mwikulu, ne alimubalangwa ba Nyasaye.

Naye alilomaloma nashili khululala indaana (omutoro) nende nali omukhongo ne aliba mubandu abalayi.

Mariam naboola; “Nyasaye wanje omulesi ndakhanyoola endie omwana ne omundu ashiili okhundilakho?” Nyasaye naboola; “nilwakali endio Nyasaye alonganga shiayenya Nabusia likhuwa abolangasa mbu libe! Niliba.”

Ne yetsa (Nyasaye) okhumwechesia okhuhandika nende amachesi nende Itaurati nende Injili.

Ne ni omurumwa khubaana ba Israili, ababoolela mbu;” Esie obetseele nende ishimanyisio okhurula khu Nyasaye wenyu omulesi, mbu abalonjela okhurula khuliloba ishifwanani shieliyoni, mana efuremo emiuya ne liba liyoni khu bunyali bwa Nyasaye. Ne nditsa okhuhonia abawofu nende abamachele, na ndala lamusia abafu khubunyali bwa Nyasaye. Ne ndalababoolela shiamulia nende shiamubikha mutsinzu tsienyu. Toto mukano khulomo nende eshimanyisio khwinywe nimuli mbu mwasuubila.

Ne endinyisia kali inyuma wanje mu Taurati ne abasubule ebindu bindi biamwali nimwekalilwa, ne ebestele nende ebimanyisio okhurula khu Nyasaye wenyu omulesi, kho murie Nyasaye wenyu ne mulonde shiebabolela.

Toto Nyasaye ni omulesi wanje ne ni omulesi wenyu kho mumulaame ino ni injila ilunjifu.

Omurumwa Isah shingala yalola hakari wabu obukhayi nibuliwo yaboola mbu; “Ni wina omukhonyi wanje khuNyasaye?” Abechi bebe nibaboola; “Efwe khuli abakhonyibo khu Nyasaye, Khusuubile Nyasaye ne ba omuloli mbu efwe khuli abehotselefu.”

Nyasaye wefu omulesi, khusubile akaweshia, ne khulondele – injila- womurumwa kho khuhandiche halala nende abaloli.

Abakhayi nibapanga amakhuwa Naye Nyasaye napanga, naye Nyasaye niyeomupanji omulayi po.

Olwa Nyasaye yaboola; “Ewe Isah esie nditsa okhufwisa ne nditsa okhukulusia ewanje ne nditsa okhukhulinda okhurulana nende abakhayi balia ne nditsa okhuraa balia bakhulonda hekulu wabalia bakhukhaya okhula inyanga yeyindukho. Ne amakalushilo kenyu kaliba khwsie, ndili babusilia kalia kamwakabukhananga.

Ne balia bakhaya ndilibahelesia eshinyasio eshilulu mushialo nende mwikulu ne shibalinyola ubahabina tawe.

Ne balia basuubila mana nibakhola amalayi Nyasaye alibarunga omurungo kwabu omulamba Ne Nyasaye shiyachama abamabii tawe.

Kakhukhusomelanga kano ni ebimanyisio nende obwitsulisio obwa machesi.

Toto okhufwana khwa Isah ewa Nyasaye khulishinga okhufwana khwa Adam, yamuloonga okhurula khwiloba mana namuboolela; Ba mana naaba.

Buno ni obwatoto okhurula khu Nyasaye wuwo omulesi, kho olaba mubalia bakholanga tsinganakani tawe.

Ne balakhureba – mukhuyingana- obumanyi buno nibumalile okhukhulila babolele mbu; “ itse khulange abana befu nende abana benyu,abakhasi befu nende abakhasi benyu, nende efwe abene nende enywe abeene, mana khusabe mubwihotselefu nikhwenya eshilamo shia Nyasaye shishile ababeyi.

Toto kano niko amakhuwa katoto. Ne abulao Nyasaye wuundi ulali Nyasaye tawe, Ne toto Nyasaye niye owa-amani awamachesi.

Ne nibakhaya manya mbu toto Nyasaye yamanya muno abonooni.

Boola; “Enywe abandu beshitabu itsee khulikhuwa elia abwene hakari wefu nende enywe, khulalaama yesiyesi oulali Nyasaye tawe, ne khulamutsokasiakho nende shiosishosi tawe, nekhulakholana efwe khwefwe okhuba eminyasaye emilesi chilali Nyasaye tawe.” Ninibakhaya boola mbu; “Mube abaloli mbu efwe khuli abasalamu.”

Enywe abaandu beshitabu, shichila shina nimuyingananga khu Ibraheem, ne Itaurati nende Injili shibieshibwa halali niyakhamala okhutsia. Kho shimuparangakho tawe.

Lola enywe bano muyingananga khumakhuwa ka mumanyile, Ne shichila shina lano muyingananga khumakhuwa kamukorerwe? Ne Nyasaye Amanyile nanyu mukorerwe.

Ibraheem shiayali omuyahudi nohomba omukiristo tawe, halali yali omulunjifu omwihotselefu(Omusalamu) ne shiyali mubatsookasi tawe.

Abandu bali ahambi nende Ibraheem muno ni balia abaloonda Injili yiye nende omurumwa uno nende abasubili. Ne Nyasaye niye omulindi wabasubili.

Kuliwo omukanda khubandu beshitabu bekombanga okhubakosia, ne shibakosia tawe halali bekosia abeene, nabo shibamanyile tawe.

Enywe abandu beshitabu, shichila shina mukhayanga ebimanyisio bia Nyasaye na enywe toto nimulolanga.

Enywe abandu beshitabu shicila shina mufwalanga obwatoto obubeyi nemufisanga obwatoto nimumanyile.?

Ne omukanda mubandu bahebwa eshitabu, baboola mbu; subile khukalia keshilibwa abasuubili okhuchaka khweshitere, ne mukakhaye okhuwa kweshitere, babebario khobanyoole okhukalukha.

Ne mulasuubila yesiyesi tawe halali ulia waloonda idini yenyu. Boola; toto obulunjifu ni obulunjifu bwa Nyasaye, omundu ahelesibwe shinga enywe mwahelesibwa, nohomba babarebe imbeli wa Nyasaye wenyu Omulesi, Boola; Toto tsimbabaasi tsili mumikhono chia Nyasaye. Yelesinjia owayenya, Ne Nyasaye ni omuyinda owamachesi.

Yawulanga owayenya okhumwa tsimbabaasi tsitsie, ne Nyasaye niye owetsimbabaasi tsikhongo.

Ne mubandu beshitabu aliwo ulia nomuchelekha okhukhubishila omwandu abikha ne alakhukalusilia. Ne mubo aliwo ulia nomwelesia isende ndala sakhukalusilia tawe, ilali nomwemele okhumubanza. Kano nilwokhuba mbu baboola; khubula ukhufunania mubakorwa okhusooma bano, bachishilanga Nyasaye obubeyi nibamanyile.

kali kario, ulia omwisikwa ukholanga kalachile , mana naria Nyasaye, Toto Nyasaye yayanza abamuria.

Toto balia bakusinjia indache ya Nyasaye nende ebitsubo biabu obukusi obutiti, Abo shibalibakho nende obulayi bwosibwosi mwikulu tawe, ne Nyasaye shaliboola ninabo tawe, ne shalibalingakhwo inyanga yeyindukho tawe, neshalibatswenula tawe, ne balinyoola eshinyasio eshilulu.

Nibaliwo bakalukhaninjia tsindimi tsiabu mukhusooma eshitabu, khomupare mbu ako karula mushitabu, ne shikarula mushitabu tawe, Ne baboolanga mbu; kano karula khu Nyasaye, neshikarula khu Nyasaye tawe, nebabeyelanga Nyasaye nabo nibamanyile.

Sikanyala okhuba omundu wahebwa nende Nyasaye eshitabu nende amachesi nende oburumwa mana abolele abandu mbu; muname esie abundu wokhulama Nyasaye; Halali ababolela mbu, mube bokhulaama Nyasaye wenyu omulesi webindu biosi shichila enywe mwechesinjia eshitabu neshichila mushisomanga.

Ne salabalomesia okhukhola abamalaika nende abarumwa okhuba Nyasaye tawe. Koo yakhabalomesia obukhayi nanyu nimumalile okhuba abasubili.?

Ne ( yitsulisia ) olwa Nyasaye yalakana nende Abarumwa mbu ; nemala okhubelesia akarula mushitabu nende amachesi, mana abetsele omwurumwa ufuchilisania nende kamulinako, kalaba khwinywe mumusuubile mana mumukhonye. Naboola koo mufuchilile mana muchamile amalakano kanje khu kano? Nibaboola; khuchamile, Naboola; mana mube abaloli, nasi endi ninanyu halala mubaloli.

Ne balakalukhana okhurula mukano, abo nibo abandu abashiamu.

Koo benyanga idini ilali ya Nyasaye, ne buli shili mwikulu nende khushialo biehotselesia khulwo khumuria ye bichame bikhaye, na ni ewuwesa ni abalikalusibwa.

Boola; khusubile Nyasaye nende akeshelibwa khu Ibraheem nende ka Musa yahelesibwa nende Isah nende abarumwa okhurula khu Nyasaye wabu shikhukabukhasinjiakho hakari wabu tawe, nafu khusilime khuye.

Ne ukhaba idini ilali yobwisilamu salichamilwa tawe, neye mwikulu aliba khubandu basikha.

Nyasaye anyala okhulunjisia arie abandu bakhaya nibamalile okhusuubila khwabu, ne mana nibaba abaloli mbu omurumwa uno niwabwatoto, mana ebifune bia habulafu nibiboolela, Ne Nyasaye shalunjisinjia abandu abamabii taawe.

Abo omurungo kwabu ni mbu balinende eshilaamo shia Nyasaye nende shiabamalaika nende shia abandu boosi. Balimenyamo tsinyanga tsiosi, shibalitutuyilibwa eshinyasio tawe ne shibalihebwa obwiyangu tawe.

Balimenyamo tsinyanga tsiosi sihbalitutuyilibwa eshinyasio tawe neshibalihebwa obwiyangu tawe.

halali balia basaba eshileshelo khwako, mana nibaba abalayi Toto Nyasaye niwobulesheli owetsimbabaasi.

Toto balia bakhaya nibamalile okhusuublia, mana nibameta okhukhaya, shibalileshelwa tawe ne abo nibo abakori.

Toto balia bakhaya mana nibafwa nibali abakhayi shibalichamilwa tawe kata nibarusia idhahabu eshialo eshilamba okhubanunula. Abo balinyoola eshinyasio eshilulu ne shibaliba nende ubahabina tawe.

Ne shimulanyoola obulayi tawe okhuula murusie khubilia biamwachama, ne shiosi shiosi shiamurusia toto Nyasaye ashimanyile.

Buli eshilibwa shiali shiafuchililwa okhulibwa khu baana ba Israil halali shia Israil yeyikalila omwene itaurati nishili okhwishibwa, boola; Rere Itaurati muyisome toto nimuli mbu miboolanga obulamba.

Ne balia bachishila Nyasaye obubeyi okhurula khwako, mana abo nibo ababii.

Boola; Nyasaye abolanga obwatoto, kho londe emilukha cha Ibraheem omulunjifu, ne siyali mubatsokasinjia Nyasaye tawe.

Toto inzu yokhuranga barererwao okhulamilamo ni ilia ili Bakka, eyehebwa tsikhabi nende obulunjifu khubandu boosi.

Mukari omo khulimo nende ebimanyisio bilolekha, amemelo ka Ibraheem, ne winjila omo abanende omulembe, Ne neshilachilo shia Nyasaye khubandu okhuhija khu- inzu eyo, khu ulia unyala oluchendo lwokhutsia eyo. Ne ulia ukhaya ne Nyasaye toto siyenya shiosi shiosi khubandu tawe nomuyinda.

Boola; enywe abandu beshitabu shichilanga shina nimukhaya ebimanyisio bia Nyasaye, ne Nyasaye nomuloli wa kamukholanga.

Boola;. Enywe abandu beshitabu, mbushina mwikalilanga ulia usuubile injila ya Nyasaye nimuyikonyela amakosa nanyu nimulola. Ne Nyasaye shang’ang’alanga khukamukholanga tawe.

Enywe abasuuli nimuloonda omukanda okhurula mubandu balia bahebwa eshitabu, betsa okhubakalusia nimumalile okhusuubila mubukhayi.

Ne mulakhaya murie ne musomelungwa tsinyaali tsia Nyasaye. Ne omurumwa ali hakari wenyu? Ne ulia utilana nende Nyasaye oyo yamala akhulunjisibwa khu injila ingololofu.

Enywe abasuubila, murie Nyasaye okhumuria khwatoto, Ne mulafwa nimulali abasalamu tawe.

Ne mutilane khumukoye kwa Nyasaye halala, ne mulakabukhana tawe, ne yitsulile tsimbabaasi tsia Nyasaye khwenyu, olwa mwali abeene khubeene abasuku, mana niyongasia emioyo chienyu, ne khutsimbabaasi tsie nimuba abaananda (beyinda ndala), ni mwali khulukuku lwelitukho lwomumulilo mana nabaresiakhwo. Na endio nilwa Nyasaye abenoosilinjia Ibimanyisio bibiee kho munyoole okhulunjikha.

Ne kube mwinywe omukanda kulanjililanga abandu okhukhola amalayi, okulomesinjia abandu okhukhola amalayi na okukania amabii. Ne abo nibo ababura.

Ne mulabashinga balia abakabukhana mana nibaburana obwatoto nibumalile okhubolela, abo bali nende eshinyasio eshilulu.

Inyanga yobweni bulilaba tswe, nende iyanga yobweni, bulimaliya ti,, Nebalia bobweni bwabu bulimaliya ti, baliboolelwa; enywe mwakhaya nimumalile okhusuubila? Kho mana mupile eshinyasio shinga mwakhayanga.

Ne balia bobweni bulilaba tswe, baliba mutsimbabaasi tsia Nyasaye, Balimwenyamo tsinyanga tsiosi.

Etso ni tsinyaali tsia Nyasaye khukhusoomelanga khubwatoto, ne Nyasaye shiyenyanga okhukholela obubii abandu tawe.

Ne buli shiosi shili mwikulu nende mushialo nishia Nyasaye, ne ewa Nyasaye ne amakhuwa koosi kalikalukha.

Enywe muli omukanda omulayi kwarusibwa khulwa abandu, shichila mulomesinjia amalayi ne mukaninjia amabii. Ne musuubilanga Nyasaye. Ne abandu beshitabu basuubilanga bwakhabele obulayi khubo. Mubo balimo abasuubili halali obunji bwabu nabakori.

Abasuku shibalabaumisia tawe halali okhubasinjisiasa. Ne nibalwana ninanyuu balabechesia emikongo chiabu mana khandi shibalahabinwa tawe.

Bakhupwa nobuteshele, wosiwosi abanyolekhana, halali nibatila omukoye kwa Nyasaye nende omukoye kwabandu. Mana nibakhoyeshela liruma lia Nyasaye mana napakhupa nobutakha. Ako nilwokhuba mbu bakhayanga ebimanyisio bia Nyasaye, ne beranga abarumwa khunjila ilali yatoto. Ako nilwokhuba mbu bakwa mwiswa na ngala baruumanga amalako.

Boosi sibali nashilala tawe, khulimo nende abandu beshitabu bandi beema obulayi basomanga tsinyali tsia Nyasaye eshilo nende eshitere nabo khandi bamwinamila (nibasujuda).

Basuubilanga Nyasaye nende Inyanga yeyindukho, nebalomesinjia okhukhola amalayi, nebakaninjia amabii, ne belushilanga okhukhola amalayi ne abo nibo abamalayi.

Nekabakhola mumalayi sibaliimwa omurungo kwako tawe, Ne Nyasaye amanyile muno abamuria.

Toto balia bakhaya, omwandu kwabu nohomba abaana babu shibabalikhoonya shiosishiosi imbeli wa Nyasaye tawe, ne abo nibo abandu bomumulilo balimenyamo tsinyanga tsiosi.

Ebia murusinjia khubulamu bwokhushialo buno bili shinga omuyeka kulinende omunyiri khweibarafu, mana nikunyoola omukunda kwa abandu bakholela obubii emioyo chiabu mana nikunyasia. Ne Nyasaye shabakholelanga obubii tawe halali abeene nibo bekholelanga obubii.

Enywe abasuubili mulakholela okhuba abesikwa benyu abandu balali ninanyu. Shibalalekha okhubakholela obubii tawe. Bayanza okhulola akamunyasia. Imalile okhumanyikha isila yabu khuminwa chiabu, ne kabafisanga mubilifu biabu ni amakhongo muno. Khumalile okhuloloselia ebimanyisio nimuba toto nimuretsanga mubwongo.

Mana enywe bano mwabechama, nabo shibabachama tawe, Nanyu musuubilanga ebitabu biosi. Ne nibabukanana ninanyu nibaboola mbu; khusuubile , ne nibaba bonyene babalumilanga tsinzala khu isila. Boola “fwe nende isila yenyu, toto Nyasaye yamanya kali mubilifu.”

Ni munyoola obulayi bwosibwosi bibasinyisia, ne ni munyoola obubii bibasangasia. Neni mwisumilisia mana murie (Nyasaye), omubayo kwabu shikulabakhola shiosishiosi tawe, Toto Nyasaye abotokhananga koosi kamukholanga.

Ne olwa warula mumabwibwi nolekha abandu bobo, shichila okhupanga abasuubili mwiyie, na Nyasaye nomuwulili muno ne omumanyi po.

Emikanda chibili mwinywe nichinjilamo oburi, mbu betsa okhushilwa, ne Nyasaye niye omulindi wabu, Ne abasuubili besikesa Nyasaye yenyene.

Ne Nyasaye yabahabina mubadiri nanyu ni muli abateshele. Kho murie Nyasaye kho munyoole okhupa orio.

Olwa waboolela Abasuubili mbu; koo shibibayela tawe nikali mbu Nyasaye wenyu alabakhoonya nende Abamalaika elfu tsitaru abakholomosibwa?

Koo, nimwista okhuba abesumilisi mana murie Nyasaye nekata abasuku nibabarusia mapwoka, awo Nyasaye wenyu omulesi alabakhoonya nende abamalaika elfu tsirano batsunukhanga nibalwana namaani.

Ni Nyasaye siyakhola kano ilali bube obusangali khwinywe, ne emioyo chenyu chinyoole okhwihotselesia, ne obukhonyi sibirulanga aundi tawe ilali khu Nyasaye, owoluyali owa-amani owamachesi.

Endio nilwokhuba atete ebuleka khubakhayi nohomba abareesie (abatukuyie) banyoole okhukalukha inyuma, nabo nibatorere.

Na ewe obula liosiliosi mukano, nalabaleshela nohomba abahelesie eshinyasio shichilabo nibamabii.

Nebiosi bili mwikulu nende mushialo ni bia Nyasaye, aleshelanga wayenya ne ahelesinjia wayenya eshinyasio, ne Nyasaye ni omulesheli muno owetsimbabaasi.

Enywe abasuubila, mulalia riba tawe nimumetelakho ekulu ekulu, ne murie Nyasaye khomunyoole okhubura.

Ne murie omulilo kwarecheshelwa abakhayi.

Ne wulile Nyasaye nende omurumwa wuuwe kho munyoole tsimbabaasi.

Ne yilushile obulesheli bwa Nyasaye wenyu omulesi, nende Jannah yobubambalifu bwayo ni likulu nende eshialo, Yarecheshelwa abaria Nyasaye.

Balia barusinjia nibenyala nende nibali mubutinyu, nende beyikalilanga liruma nende baleshelanga abandu, Ne Nyasaye yachama abakholi abamalayi.

Balia nibakhola amabii nohomba nibakosela emioyo chabu betsulila Nyasaye mana nibasaba eshileshelo khutsimbi tsiabu, ne ni wina uleshelanga tsimbi ulali Nyasaye, ne sibatsililanga okhukhola akabakhola nabo nibamanyile tawe.

Abo omurungo kwabu ni obulesheli okhurula khwu Nyasaye wabu omulesi, nende emikunda chiburangamo emialo, balimenyamo tsinyanga tsiosi, ne ni omulayi muno omurungo kwa bakholi bamalayi.

Imbeli wenyu chiakhabula emilukha eminji, kho chende khushialo mulole indukho yabachayi.

Kano nika abulafu khubandu nende obulunjifu nende amachelo khubalia baria Nyasaye.

Ne mulabongoya, nohomba mlabelela tawe, toto enywe nenywe bahekulu nikali mbu toto muba abasuubili.

Obubii nibubanyoola manya mbu abandu bandi abo banyoola obubii shinga obo. Ne etso nitsinyanga tsia khukalukhaninjia mubandu, kho Nyasaye arusiemo abasuubili ne yawule mwinywe abalobole be. Na Nyasaye shiyachama abobubii tawe.

Ne khandi Nyasaye yosie balia abasuubila ne abasukune ehale abakhayi.

Koo, muparanga mbu mulenjilasa mwikulu Nyasaye nashiili akhumanya balia abakhalabani mwinywe ne abamanye abokhwifila?

Ne enywe mwekombanga lifwa nimushili okhubukanana nalio. Kholaano mumalile okhulilola nanyu nimuhenga.

Ne Mohammad shiyali halali omurumwa butsa. Abarumwa babura imbeli wuwe, koo nafwa nohomba niyerwa, mulabotokhana mukalukhe inyuma? Ni ubotokhana yakalukha inyuma oyo shakholakho shiosishiosi Nyasaye tawe, Ne Nyasaye alarunga balia bamukhupilanga orio.

Ni omundu shiyakhafwasa tawe halali khubuchami bwa Nyasaye, shingala yahandichilwa, ne owenya omurungo kwokhushialo khwitsa okhumuwaa, ne owenya omurungo kwo mwikulu khwitsa okhumuwa, ne alarunga balia bakhupanga orio.

Ne ni Abarumwa benga balwana ne halala ninabo abasuubili abanji bakholanga shichila Nyasaye, shibakhola oburi khukabanyoola khunjila ya Nyasaye tawe, nohomba shibateshelekhana nohomba shibatofula, tawe ne Nyasaye yachama abefwilanga.

Ne amakhuwa kabu kalisa okhuboola mbu; Nyasaye omulesi wefu, khuleshele ebionono biefu, nende okhubura eshichelo khwefu, khumakhuwa kefu, ne tinyilisia ebilenge biefu ne okhuhabine khushile omukanda kwabakhayi.

Mana Nyasaye nabahelesia omurungo omulayi kwokhushialo nende omurungo omulayi komwikulu, Ne Nyasaye yachama abakholanga amalayi.

Enywe balia abasuubila, nimuloonda balia abakhaya betsa okhubakalusia inyuma, ne mwitsa okhuba mubasikha.

Halali Nyasaye niye omulindi wenyu naye niye omukhoonyi omulayi muno.

Khwitsa okhura obuyendi mumioyo chabakhayi, shingala batsokasia Nyasaye nende abalarumilwakho eshifune, ne ashimenyo shabu ni mumulilo, Ne nieshimenyi eshibi po khubakholi bamabii.

Ne Nyasaye yabakholela toto akayabalaka shingala mwaberanga khubuchamibwe, okhuula shingala mwatoratora mana nimusoolana khulikhuwa, mana nimukhaya olwa yabechesia eshiamwachama, baliwo mwinywe balia benyaanga eshialo, ne balio mwinywe benyanga mwikulu. Mana nabakabukhasia ninanyu okhubatema naye toto yamala okhubaleshela enywe, Ne Nyasaye niwetsimbabaasi khubasubili.

Olwa mwelukhanga tsimbilo nimulawulila yesiyesi tawe, ne omurumwa nabalanganga nali inyuma wenyu, mana Nyasaye nabawa ubusiro khubusiro, khomulabeelela khukababurire tawe nohomba khukabanyoolele, enywe. Ne Nyasaye amanyile koosi kamukholanga.

Mana nabarerera ubwihetselefu okhula mubutinyu, tsindolo tsiatila umukanda mulala mwinywe, Ne omukanda kundi mwinywe emioyo chiabu chabakanakania paka baparira Nyasaye amaparo kalali katoto, amaparo keshisilu, nibaboola; Koo mana khulukho nende shiosishiosi mulikhuwa lino? Boola; amakhuwa koosi nika Nyasaye, Bafisanga mumioyo chiabu kabalakhuboolelanga tawe. Baboolanga mbu; khubetsanga mbu khuli nende shiosishiosi mulikhuwa lino shikhwakhererwe ano tawe. Boola; kata mubetsanga mutsinzu tsienyu, abahandichilwa okhufwa bakharulile, batsia abundu wabu abandichilwa okhufwa bafwilao. Kano ni okhubeela Nyasaye ateme kali mubilifu bienyu, ne yosie kali mumioyo chenyu. Ne Nyasaye amanyile muno kali mubilifu.

Toto balia bakalukha inyuma inyanga yemikanda chibili chiabukanana shetani niye owabareresia khumakosa kabakhola, ne Nyasaye yamala okhubaleshela. Toto Nyasaye niwobulesheli omwihotselesi muno.

Enywe abasubila, mulabashinga balia bakhaya, mana nibaboola khubashiabwe ngala basamula khushialo nohomba ngala batsia mwiye: “Babetsangano ninaafu sibakhafwile tawe nesibakhererwe tawe.Kho Nyasaye akhole oko okhuba okhubelela mumioyo chiabu. Ne Nyasaye niye welesinjia obulamu ne niye ufwisinjia. Ne Nyasaye alolanga kamukholanga.

Ne nimwirwa khunjila ya Nyasaye nohomba ni mufwa toto obulesheli nende tsimbabaasi tsirulanga khuNyasaye tsishila kalia kamukhung’asinjia.

Ne nimufwa nohomba ni mwirwa ni ewa Nyasaye ni amulikhunga’sibwa.

Ne nikhulwa tsimbabaasi tsirulanga khu Nyasaye nitso tsichila noba omuhotselefu khubo, Ne obetsanga omululu, womwoyo omusiro(Omumu) bakhakhwilushe. Khomana baleshele ne obasabile eshileshelo, ne sanjilana nabo mumakhuwa, Ne nomala wabusia ,wisiche Nyasaye, toto Nyasaye yachama abandu bamwisikanga.

Ne Nyasaye nabahabina abulao wakhabashila, ne nabasukuna niwina wuundi ulaliye wakhabahabina. Ne Nyasaye butswa niwabasubili besiche.

Ne shikanyalikhana khumurumwa yesiyesi okhukhoba tawe. Ne ulia ukhoba alitsa nende shiayakhoba inyanga yeyindukho, ne omundu alirungwa kayakhola, nabo shibalikholelwa obubii tawe.

Koo! Ulia waloonda kachamisia Nyasaye ali shinga ulia wakhoyekhana liruma lia Nyasaye? Ne eshimenyo shiaye nimumulilo Nao ni abundu abi muno okhwinjila.

Abo bali nende tsingasi tsikabukhane, ne Nyasaye alolanga muno akabakholanga.

Toto Nyasaye yakholela obulayi obukhongo Abasubili, olwa yawula mubo Omurumwa, okhurula khubo abeene, owubasomelanga tsinyaali tsitsie, ne owubatwsenulanga, ne abechesinjia eshitabu nende amachesi kata nikali mbu inyuma awo bali mubukori bwabulafu.

Enywe olwakabanyoola amasila, -amasila ka enywe mwabahelesia mara khabili nga ako,- muboola mbu karulile hena kano? Boola; “ako karulile khwu enywe abeene”. Toto Nyasaye ni Omunyali wa buli eshindu.

Amasila kabanyoola olwa emikanda chibili chabukanana(khuliyie) kali khubuchami bwa Nyasaye, kho abamanye Abasuubili.

Nekho anyoole okhumanya abeshikhabili, nibaboolelwa mbu; “Itse mulwane khunjira ya Nyasaye noho mulinde.” Nibaboola; khumanyanga mbu ni okhulwana toto shikhwakhabalondelekho tawe. Abo inyanga eyo bali ahambi nende obukhayi, okhushila obusubili, baboolanga neminwa chiabu kalali mumioyo chiabu, ne Nyasaye amanyile muno akabafisanga.

Abo nibo baboolela abana babu, ne abeene nibekhala; Bakhuwulilanga shibakhererwe tawe, Boola; yikalilekho lifwa okhuboolela enywe toto nimuli mbu muboolanga habwene.

Mulapara mbu balia bererwe khunjila ya Nyasaye mbu ni emilambo tawe. Halali bo ni abalamu banyoolanga amukabo kwabu ewa Nyasaye.

Basangalilanga aka Nyasaye yabahelesia khu tsimbabaasi tsitsie, bekhoyelungwa nende balia bashiri okhuba nabo halala abali inyuma wabu, mbussibalaba nobuyendi tawe, neshibalabeelela tawe.

Bekhoyelanga obwokholo okhurula khu Nyasaye nende tsimbabaasi tsitsie , Ne toto Nyasaye shakosinjia omurungo kwa basuubili tawe.

Balia bafuchilila Nyasaye nende Omurumwa wuwe- olwa bali nibanyoolelwe nende tsinguma, ne balia bakhola amalayi mubo mana nibaria baliba nende omurungo omukhongo.

Balia baboolelwa nende abandu mbu; “Abandu babakhung’anile, Mubarie! Ako nikabameta obusuubili, nibaboolela Mbu; “ Nyasaye Akhuyela naye niye omulayi po wokhwisikwa.”

Kho mana nibakalukha nende obwokholo nende tsimbabaasi tsia Nyasaye, libi liosi liosi shilia banyolakho tawe, ne nibalonda ka Nyasaye achama. Ne Nyasaye niwetsimbabaasi tsikhongo.

Toto oyo ni shetanii arisinjia abetsa babe, kho mulamuria tawe, murie esie nikali mbu muli abasuubili.

Nebalia belushilanga mubukhayi balakhubeelesia tawe, Toto abo shibawumisia Nyasaye khusioshiosi tawe. Nyasaye yenya mbu alababishilakho shiosishiosi mwikulu tawe, ne baliba nende eshinyasio eshilulu.

Toto balia bakula obukhayi nibakusia obusuubili shibalawumisia shiosishiosi Nyasaye tawe, Ne bali nende ishinyasio eshilulu.

Abakhayi balapara mbu okhubalekha khwa khubalekhanga khuno mbuni obulayi khubo tawe, Toto khubametanga ebise khobamete tsimbii, ne baliba nende eshinyasio shietsisoni.

Nyasaye shiyakhalekha abasuubili muka enywe mulikho tawe okhula yawukhasie ababii nende abalayi. Ne Nyasaye shakhoyele okhubechesia kefisa halali Nyasaye yawulanga mubarumwa bebe wayenya. Ne subile Nyasaye nende abarumwa bebe, nimusuubila mana mwara Nyasaye mulaba nende omurungo omukhongo.

Ne mulapara mbu balia bemananga sha Nyasaye yabawa khu tsimbabaasi tsietsie mbu bali obulayi, halali ni obubii khubo. Baliboywa halala nende biabemananga inyanga yeyindukho. Ne ubukalusio(obuchelani) bwe bili mwikulu nende khushialo ni bwa Nyasaye. Ne Nyasaye amanyilepo akamukholanga.

Toto Nyasaye awulile likhuwa liabalia boboola mbu Nyasaye toto ni umumanani nafu khuli abayinda, khwandichile kababoola nende okhwira khwabu Abarumwa munjila ilali yatoto. Ne khulibaboolela inyanga yeyindukho mbu; “Mupile eshinyasio shiokhuyia.”

Kano nishichila akemikhono chenyu chiaranjilisia ne mbu toto Nyasaye Sali wokhukholela obubi abandu tawe.

Balia baboola mbu; Nyasaye akhulachile mbu khulasuubila Omurumwa yesiyesi tawe okhuula okhurusilie eshihanwa(isolo) isambwe nende omulilo. Baboolele mbu; “Abarumwa babetsela nende ebifune bwahabulafu ne nende shinga kamurebanga kano,kho shichila shina nimubeera toto nimuba nimuboolanga obulaamba(obwatweli).”

Ne nibakhukhaya bamala okhukhaya Abarumwa bandi imbeli wuwo, abetsa nende ebifune bia habulafu nende ebitabu bia machesi, nende eshitabu shiobulafu.

Buli omundu alipila okhufwa, mana toto mulihebwa omurungo kwenyu inyanga yeyindukho, Oulirebwa ehale nomulilo, alinjisibwa mwikulu, oyo aliba aburire. Ne obulamu bwokhushialo shineshindu tawe halali okhwisangasia khwokhwikatia.

Ne toto mwitsa okhunyoola emiresio mumiandu chienyu nende mwiywe abeene. Ne khandi toto mulawulila kabasinyisia amanji okhurulana nende Abandu bahebwa eshitabu, imbeli wenyu, nende balia abatsokaasi. Ne ni mwifwila mana mwaria Nyasaye, toto ako ni amakhuwa amalayi po kokhukhola.

Ne olwa Nyasaye yalakana nende balia bahebwa eshitabu mbu; “Ni okhuula mwinosilie abandu, ne shimulafisa tawe.” Basukuna indakano eyo inyuma wemikongo chiabu nenibakula obukusi obufwolwa, kho neshibi muno eshiabakula esho.

Olabaparira balia abasangalanga akabakholele, ne nibachama okhulaywa khukabalakholele, olabaparira mbu balihonokokha nende eshinyasio tawe. Baliba nende eshinyasio eshilulu.

Ne obwami bwomwikulu nende mushialo nibwa Nyasaye, ne Nyasaye nomunyali wabuli eshindu.

Toto mukholongwa khwe likulu nende eshialo nende okhukalukhana khweshilo nende eshitere khulimo nende ebimanyisio khubandu bamachesi.

Abetsulilanga Nyasaye mekhala nende meema nende makona . Ne baparanga khukhulongwa khwelikulu nende eshialo nibaboola mbu : “ Nyasaye wefu Omulesi, shiwalonga bino eshikhaya tawe. Obutswenufu nobubwo, kho khulinde okhurulana nende eshinyasio shiomulilo.”

Nyasaye wefu Omulesi, toto ulia wora mumulilo olaba omubakaale. Ne balia bakhola obubii shibaliba nomukhonyi tawe.

Nyasaye wefu omulesi, toto efwe khwuulile omulanji nalaanga khubusuubili mbu; “Musuubile Nyasaye wenyu omulesi” mana nikhusuubila. Kho khuleshele tsimbi tsiefu ne okhuleshele ebionono biefu, ne okhufwisie halala nende abandu abalayi.

Nyasaye wefu omulesi okhuhelesie akawakhulaka khubarumwa boobo, ne olakhubakala inyanga yeyindukho tawe, Toto ewe shofunakanga indakano tawe.

Nyasaye webu omulesi, nafuchilila amasayo kabu, nakalusia mbu: Toto esie shengosinjia emilimo chio omukholi yesiyesi mwinywe tawe, abe omusatsa nohomba omukhasi, enywe khwinywe, Kho balia bawuya nende balia balondwa mumatala kabu, mana nibasandibwa khunjila yanje, mana nibalwana , mana niberwa, toto esie nditsa okhubaleshela ebionono biabu, ne toto nditsa okhubenjisia mumikunda chemialo chiburangamo. Oko niko omurungo okhurula khu Nyasaye. Ne ewa Nyasaye chiliyo emirungo emilayi po.

Okhuyiyayiya khwabakhayi khushialo khulakhukatiakho tawe.

Okho ni okhwisangasia khutiti mana eshimenyo shiabu shilaba Mumulilo, ne ni abundu abipo wokhuhulushila.

Halali balia baria Nyasaye wabu omulesi balinyoola emikunda chiburangamo emialo hakari wachio, Balimenyamo tsinyanga tsiosi. Obucheni okhurula khu Nyasaye. Ne ebili ewa Nyasaye ni ebilayi biabandu abalayi.

Toto mubandu bahebwa eshitabu balimo basuubilanga Nyasaye nende kalia keshibwa khwinywe nende kalia kabeshilibwa, behotselesilinjia Nyasaye. Sibakusinjia tsinyali Tsia Nyasaye khubukusi obufwola tawe. Bali nende omurungo kwabu khu Nyasaye wabu omulesi. Toto Nyasaye ni omwangu wakhubala.

Enywe balia basubila, mwisumilisie ne mushilane khukhwisumilisia, ne mube meso, ne murie Nyasaye kho munyole okhubura.