Al-Qamar

Indukho ilihambi, ne omwesi kwabuukhemwo.

Ne nibalola eshimanyisio shiosi shiosi bashifutarira nibaboola mbu “ buno nobulosi butsilililanga” .

Ne baingasia ne nibaloonda okhwenya khwabu, ne buli likhuwa liemekhwa.

Netoto kamala okhuboolela amakhuwa kalimwo obwalaba.

Amachesi kafung’anile, halali amekanyilisio shikakhoonya eshindu !

Mana lekhana ninabo. Inyanga yalilaanga omulaanji okhutsiila likhuwa lio mwoyo kwakhaya.

Tsimoni tsiabwe tsilihenga hasi, Balirula mubilindwa opara mbu nitsisiche tsisaalanibwe.

Nibelushila omulaanji, ne abakhayi baliboola mbu: “Inyanga ino ni indinyu.”

Abandu ba Nuh bakhaya bo nibashili, nibayingasia omusumba wefu, nibamuboolela mbu nomulalu mana nibamwalabila.(nibamululila)

Mana nasaba Nyasaye wuwe; naboola mbu: Toto isie ekhailwe, kho habine.

Mana nikhwikula emiliango chomwikulu khu maatsi kayombokhanga.

Ne nikhufutula liloba nikhukhola emialo (emichela), amatsi nikabukanana khulikhuwa liali niliburire.

Ne nikhubachinga khushietsimbao nende imikoye. (isafina)

yatsitsanga nikhuyihenga, okhuba ni omurungo khu kalia kabamuingasinjia.

Ne toto bwene khwachikhola okhuba eshimanyisio, ne koo khuliwo nende witsulila?

kho ishinyasio shianje shiali shirie, nende okhwikanyilisia khwanje.

Ne toto efwe khwakhola Ikurani ibe inyangu okhumanya, ne koo khuliwo nende witsulila?

Babu A’di bakhaya, kho eshinyasio shianje shiali shirie nende okhwikanyilisia khwanje.

Toto efwekhwabarumila omuyeka kweyimbumbuyeka khutsinyanga tsimbi tsilondokhaane.

Nikusiula abandu opara mbu nebisichiri bie misala chisiulilwe.

Mana eshinyasio shianje shiali shirie nende amekanyilisio kanje.

Netoto efwe khwakhola Ikurani ibe inyangu okhuyimanya, Ne koo khuliwo nende witsulila ?

Abandu ba Tsamudi bayingasia abekanyilisi.

Nibaboola mbu : Khuloonde omundu namundu urula mwifwe, efwe mana khuba khulaba mubukori bwahabulalu.

Niyesa yenyene okhurula mwifwe wamakanyilisio keshela ? halali uno nomubeyi omukhongo omufuru.

Nibamanye mutsuli niwina umubeeyi omukhongo omufuru.

Toto efwe khwitsa okhubarumila ingamia ikhasi kulwa okhubatema, mana obahenge butswa mana wifwile.

Ne baboolele mbu amatsi balakabanamwo hakari wabu, balakabukhasibwa khulwa okhukanywa.

Mana nibalaanga omundu wabu, niyetsa nayisinza.

Ne eshinyasio shianje shiali shirie nende okhwikanyilisia khwanje.

Toto efwe khwabarumila oluyoka lulala lwonyene, nibabashinga abitiisi biokhusirira olukaka.

Ne toto efwe khwakhola Ikurani okhuba Inyangu, ne koo khuliwo nende witsulila?

Abandu ba Lut bayingasia abekanyilisi.

Toto efwe khwabarumila eshifulumutu shiamachina halali abaloondi ba Lut, khwabahabina mumabwibwi.

Tsimbabasi okhurulu khwifwe, Endio nilwakhurunganga ulia ukhupanga orio muno.

Ne toto yabekanyilisilia eshinyasio shiefu, halali bo bali netsinganakani khumekanyilisio ako.

Ne toto benya mbu abahelesie abacheni be, mana nikhubawofusia tsimoni tsiabu , nikhubaboolela mbu: pile eshinyasio shianje namekanyilisio.

Ne toto shabeeshela eshinyasio shitsilila mumabwibwi.

Kho pile eshinyasio shianje namekanyilisio.

Netoto khwakhola Ikurani okhuba inyangu, ne koo khiliwo nende witsulila.

Netoto abakanyilisi betsela abandu ba Firaun.

Bakhaya ebimanyisio biefu biosi pe, mana nikhubatila omutilo kwa amaani kwobunyali.

Ne Abakhayi benyu bali nende amani okhushila abo baranjilila nohomba kahandikwa mubitabu mbu enywe mubule okhufunaanibwa.

Nohomba babolanga mbu: efwe khuli abaanji khulishila butswa.

Abanji abo balashilwa ne balakalukha inyuma tsimbilo.

halali inyanga yeyindukho niyabalakwa, Ne indukha ni isiro muno mana khandi indulu pa.

Toto abetsimbi balimubukori nende mubulalu.

Inyanga yabaliswerululwa mafumama nibasukunwa mumulilo, baliboolelwa mbu : pile omulilo kwa Jahanam.

Ne toto buli eshindu khwaloonga khushichelo.

Ne lilako liefu nilulusa shinga okhulimba no khulimbula tsimoni.

Ne toto khwasishia abashienywe alikho mwinywe uparanga ?

Ne koosi kabakhola kali mubitabu.

Liosi liosi lititi nende likhonga liahandikwa.

Toto balia baria Nyasaye baliba mwikulu mumikunda chilimwo emialo.

Mushikhalo shiatoto, ewo Omwami Omunyali.