Al-Anfal

Bakhurebanga omwandu kunyoolelwe mwiyie.(Kukabwe kurie) Boola; “omwandu kunyoolelwe mwiyie ni kwa Nyasaye, nende omurumwa(londe shingala betsa okhubakaba). Kho murie Nyasaye ne mukasie omulembe hakari wenyu, ne muwulile Nyasaye nende omurumwa wuwe ni muli abasuubili.

Toto abasuubili ba habwene nibalia olwa Nyasaye arumbulwa, emioyo chiabu chitsulamo oburi, ne nibasomelwa tsinyali tsiefu tsibameta obusubili, ne Nyasaye wabusa niye wabesikanga.

Balia abalumilanga okhulaama, ne khushia khubakabile barusinjia eshihanwa.

Abo nibo abasuubili batoto, bali nende obukhongo ewa Nyasaye wabu, nende eshileshelo nende omukabo omulayi.

Shinga olwa Nyasaye wuwo yakhurusia munzu yiyio khubwatoto, ne omukanda mulala mubasuubili nikulachamila tawe.

Bayingana ninawe obwatoto nibumalile okhurumbukha, opara mbu bulumungwa okhutsa mulumbe nibalola.

Ne olwa Nyasaye yabalaka mbu omukanda mulala kulaba okwenyu, mumikanda chibili chilia. Nanyu mwali muyanzile munyole omukanda kubula amawa(amani) kube okwenyu. Ne Nyasaye yenya okhura habulafu obwatoto khumakhuwa keke neateta emisi chiabakhayi.

Kho anyoole okhwemia obulamba, nende okhukwisa obubeyi, kata ababii nibalachamile tawe.

Olwa mwasaba obukhoonyi khu- Nyasaye wenyu, mana nabakalusia mbu; “Toto esie nditsa okhubahelesia abamalaika iyelefu ndala abetsa okhubetsela malondokhana.

Ne Nyasaye shiyakhola kano halali okhuba obusangali khwinywe nende okhutinyisia emioyo chenyu. Na obuhabini bubalawo halali burulanga khu Nyasaye. Ne toto Nyasaye niwaamani owamachesi muno.

(itsulile) olwa yabererera tsindolo eshimanyisio shiomulembe kurulanga ewuwe; mana nabeshilia amatsi okhurula mwikulu okhubatswenula nende okhubarusiakho obumali bwa shetani, nende okhuboya halala emioyo nende okhulandia ebilenje bienyu hasi.

(Itsulile) olwa Nyasaye wuwo olwayabafimbulila malaika(nababolela); “Toto eise endi halala ninanyu, kho re amani mubalia abasuubila, nditsa okhura oburi mumioyo chia abakhayi, kho mubakhupe hekulu khwikosi ne mutete tsinzala.

Endio nilwokhuba mbu baloba Nyasaye nende Omurumwa. Ne ulia uloba Nyasaye nende Omurumwa wuwe, toto Nyasaye ni weshinyasio eshilulu.

Kho mupile netoto abakhayi bali nende eshinyasio shomulilo.

Enywe abasuubila nimubukana muliyie nende abakhayi, mulabakalukhanilia emikongo chienyu tawe.

Ne ulia ulakalukhania omukongo kukwe inyanga eyo, halali nakalukhananga khulwa okhulwana, nohomba khutsia mumukanda elubeka wuwe okhukhonya, alaba akhoyeshela liruma lia Nyasaye, ne eshimenyo shiaye ni mumulilo. Nao ni habundu abii muno wokhukalukha.

Shimwabera tawe halali Nyasaye niye wabeera. Ne shiwalasa olwa walasa tawe halali Nyasaye niye walasa, Nyasaye yakhola kano khulwa okhuhelesia abasuubili obulunjifu burulanga ewuwe, Toto Nyasaye niye omuwulili nende omumanyi muno.

Khukano netoto Nyasaye yetsa okhutendeyia amani kabakhayi.

Nimwenya okhumanya, Obwatoto bwamalile okhuboolela. Ne nimulekha bulaba obulayi khwinywe, ne nimukalushila fwesi khulakalushila ne abandu benyu shinibabakhonyekho shiosishiosi tawe, Kata nibali abanji, Ne Nyasaye ali halala nende abasuubili.

Enywe abasuubila! Murie Nyasaye nende Omurumwa wuwe, mulamwilukha tawe nimuwulilanga.

Ne mulaba shinga balia baboolanga mbu; “Khuwulile” nekhane bashili okhuwulila.

Toto tsisolo tsimbi muno imbeli wa Nyasaye- nitsilia tsikholanga mbu sitsiwulilanga tawe- nitsindimbe, tsisilu.Tsila tsilekhonyelanga obwongo tawe.

Ne Nyasaye alolanga obulayi bwosi bwosi mubo yakha bawulilisiye nekata abawulilisia bakhakalukhanesa bakoyakoyania.

Enywe abasuubila mufuchilile omulango kwa Nyasaye nende Omurumwa olwa balanga mukalia aketsa okhubahelesia obulamu, amalayi, ne manye mbu Nyasaye yenjilanga hakari womundu nende omwoyo kwaye, Ne ewuwe ni amulikhung’asibwa.

Ne murie amatema kalakhaya okhunyoola balia bakhola obubii bonyene mwinywe, ne mumanye mbu Nyasaye ni omululu weshinyasio.

Ne yitsulile, olwa mwali batiti, olwa mwalolekhananga abateshele khushialo, olwa mwaritsanga mbu abandu okhubayula, mana nabahelesia habundu alayi okhwikhala, mana nabahelesia amani khubuhabini bubwe, ne nabahelesia omukabo omulayi khomunyole okhupa orio.

Enywe abasuubila, mulakholela Nyasaye nende omurumwa obulianga tawe. Ne mulakhola obulianga khukhusubinala khwenyu tawe- nimumanyile.

Ne manye mbu emiandu chienyu nende abana benyu ni amatemo. Ne toto Nyasaye ali nende omurungo omukhongo.

Enywe abasubila ni muria Nyasaye, yetsa okhubahelesia amachesi kokhwawukhasia amalayi namabii, ne yetsa okhubaleshela ebionono bienyu, ne alababeela, Ne Nyasaye niwetsimbabaasi tsinyinji.

Olwa abakhayi bakhututila mbu bakhutile nohomba bakhwire, nohomba bakhuwuyie mana nibatuta, ne Nyasaye nakalukhania obututi bwabu,ne Nyasaye niye omulayi muno mukhukalukhania.

Ne tsinyaali tsiefu nibasomelwa baboolanga mbu; “Khumalile okhuwulila ne nikhwenya fwesi khunyala okhuboola nga ako” Kano sini shiosi shiosi tawe, halali tsingano tsia bandu bakhale.

Ne olwababoola mbu; “ Ewe Nyasaye nikali mbu kano niko obwatoto okhurula khwiwe, mana khuupile nende ifula yamachina karulanga mwikulu, nohomba khurerere eshinyasio eshilulu.

Ne Nyasaye shiyali wokhubahelesia eshinyasio nawe Omurumwa nolimubo halala tawe. Ne Nyasaye shiyali wokhubahelesia eshinyasio ne abandi mubo nibasabanga eshileshelo tawe.

Nabo bali nende lilayi shina lia Nyasaye alabahelesia eshinyasio, nikali mbu bekalilanga abandu omusikiti okwoluyali oko, Ne shini abalindi bako tawe, toto abalindi bako nibalia abaria Nyasaye, ne obunji mubo shibamanyile shiosi shiosi tawe.

Ne isala yabu munzu indakatifu shiyali halali okhupa emilosi nende amakhofi. Kho pile eshinyasio shingala mwakhayanga.

Toto balia abakhaya barusinjia omwandu kwabu okhwikalila injila ya Nyasaye, betsa okhukurusia mana kalababeela ameyitsulisio mana balashilwa. Ne balia abakhayi balikhung’asibwa mumulilo.

Kho Nyasaye anyoole okhwawukhasia ababii nende abalayi, nende okhura ababii hekulu wababii bandi nende okhubabumba boosi halala nende okhubasukuna mumulilo. Obo nibo banyoola okhusikha.

Boolela balia bakhaya mbu; “Nibalekha, balaleshelwa akabura, ne nibakalushila, kamala okhubaburira amachelasio ka bandu bakhale.

Ne khupane ninabo okhuula mumale amatemo. Ne idini ibe yoosi shichila Nyasaye. Ne nibalekha, awo toto Nyasaye alolanga kabakholanga.

Ne ni bakalukhana mana manye mbu Nyasaye niye omulesi wenyu, ni Omulesi Omulayi muno, ne ni Omukhoonyi Omulayi muno.

Ne manye mbu shiosi shiosi shiamulanyoola muliyie ebuleka washio wa kharano ni khulwa Nyasaye nende omurumwa wuwe, nende abekho nende abana abafwilwa nende abamanani nende abalikhuluchendo, toto nikali mbu mwasuubila Nyasaye nende akakhweshila khumusumba wefu inyanga yobukabukhasio, inyanga yemikanda chibili chiabukanana, Ne Nyasaye niye mwene obunyali hekulu wa buli eshindu.

Olwa mwali mwitwoma eliasi nabo nibali mwitwoma elia hale, omukanda kwomwandu(kwa Abu Sufiyan) nikuli emwalo wenyu, ne mulakananga ebise mwakhakabukhane, halali ni mbu okhula Nyasaye abusie likhuwa liali nilikhoyekhane okhubura, kho ulia usikha asikhe ebifune bili habulafu, ne unyola obulamu amenye nende ebifune bili habulafu. Ne toto Nyasaye ni uwokhuwulila muno omumanyi po.

Olwa Nyasaye yabechesia mumalooro kenyu mbu nibatiti, ne abechesinjia mbu bo ni abaanji mwakhafwile emioyo, ne mwakhasolanilekho, Halali Nyasaye nabalinda. Toto ye ni Omumanyi muno owakali mubilifu.

Ne alwayabechesia mutsimoni tsienyu olwa mwabukanana nimubalola mbu nibatiti, ne nabakhola okhuba batiti mutsimoni tsiabu, kho libure likhuwa liayalomesia okhubura, ne amakhuwa kosi kakalusibwa awa Nyasaye.

Enywe abasuubila olwa mubukanana nende omukanda kweliyie, (okhupana) mutinye-obulayi, ne mwitsulile Nyasaye mubunji kho munyole okhubura.

Ne murie Nyasaye nende Omurumwa wuwe, ne mulasoolana tawe amakhuwa kenyu kabiya, amani kenyu kakora, ne mwisumilisie toto Nyasaye ali halala nende abesumilisinjia.

Ne mulaba shinga balia barula mutsingo tsiabu nibekhumba nibelolosia khubandu, nibekalila injila ya Nyasaye, ne Nyasaye abotokhananga koosi kabakholanga.

Olwa shetani yabaronela ebikhole biabu, mana nababoolela; “Abulao ubashila nyanga yino, nasi endi halala ninenyu”, Ne olwa emikanda chilili chieliyie olwachabukanana, shetani nakalukha inyuma naboola mbu; “Esie shendi halala ninanyu tawe, esie endolanga kamulalolanga, esie ndaria Nyasaye, ne Nyasaye ni weshinyasio eshilulu.”

Olwababoola abeshikhabili nende balia be mioyo chiabu chilimo obulwale mbu; “Abandu bano abasalamu idini yabu abakatiye” Ne ulia wisika Nyasaye toto Nyasaye niye Owamani owamachesi muno.

Ne nololakho shinga abamalaika bafwisinjia abakhayi, olwabababundulanga obweni bwabu nende emikongo chiabu, Ne” mupile eshimanyisio shiokhuyia.

“Endio nilwokhuba kalia akamikhono chienyu chiakhola, ne toto Nyasaye shakholelanga omundu yesi yesi obubii tawe.

Shinga abandu ba Firauni nende balia baliwo imbeli wabu, bakhaya ebimanyisio bia Nyasaye, kho Nyasaye nababukula khulwe tsimbi tsiabu; Toto Nyasaye niwa amani ne ali nende eshinyasio eshilulu.

Endio nilwokhuba mbu toto Nyasaye shakalukhaninjia tsimbabaasi tsia ahelesiye abandu tawe, okhula abandu bene abo bakalukhanie kali mumioyo chiabu. Toto Nyasaye ni Omuwulili Omumumanyi po.

Bali shinga abandu ba Firaun nende balia bali imbeli wabu, bakhaya ebimanyisio bia Nyasaye, mana nikhubasishia khulwa okhubeela tsimbi tsiabu, Ne nikhwibisia abandu ba Firaun, ne boosi bali abandu ababii.

Tsisolo tsimbi muno imbeli wa Nyasaye ni balia abakhayanga, mana shibasuubilanga tawe.

Balia abanobelesia amafuchilisanio, bakalukhana buli buli, ne shibaritsanga tawe.

Kho nabanyoola mwiyie ubatafie balia bali inyuma wabu khobanyoole okhumanya.

Ne noria ingalukhani yabandu bamukholele ninabo indache, basukunile indache eyo mubuleng’afu; Toto Nyasaye shiyachama abandu bakalukhananga tawe.

Ne abakhayi balapara mbu nibo abaranjilila bali-imbeli, tawe abo shibakhashila Nyasaye tawe.

Kho mwirecheshe khulwa bo shingala munyala nende amani kamunyalilwa nende tsifarasi tsiaboywa atsirecheshele; murisilie khubio abasuku ba Nyasaye nende abasuku benyu, nende abandi abalali abo, abamulamanyile tawe halali Nyasaye niye ubamanyile. Ne shiosi shiosi shiamurusia imbeli wa Nyasaye mulakalusibwa shiosi, ne shimulikholelwa obubii tawe.

Ne abasuku abo nibakhaaba omulembe wesi tsila ebwene eyo, ne wisiche Nyasaye, totoye niye owuwulilanga omumanyi muno.

Ne nibenya okhukatia toto Nyasaye akhuyela, niye owakhukhoonya nende obuhabini bubwe, nende balia abasuubila.

Ne yara halala emioyo chiabu, kata norusia omwandu kuli khushialo shino kwosi, siwakhara halala emioyo chiabu chosi tawe,halali Nyasaye yara halala emioyo chiabu, Toto ye ni wobunyali owamachesi muno.

Ewe Omurumwa, Nyasaye okhuyela nende balia bakhulonda mubasuubili.

Ewe omurumwa, lomesia abasuubili batsie okhupana, nibali mwinywe abandu amakhumi kabili abefwili betsa okhushila abandu tsimia tsibili, ne nibali abandu imia betsa okhushila iyelefu mubalia abakhaya, endio nilwokhuba mbu ni abandu balaparanga tawe.

Lano Nyasaye yakhabatoratoresilia, ne amanyile mbu mwinywe balimo abateshele, kho nimuli abandu imia ndala abefwili mwitsa okhushila abandu tsimia tsibili, Ne nimuli iyelefu mulashila abandu tsiyelefu tsibili khu bunyala bwa Nyasaye, ne Nyasaye ali halala nende abefwilanga.

Shakhoyeshela Omurumwa okhuba nende abatilwa muliyie tawe, okhula akhupane, mana ashile khushialo , mwenyanga ebindu biokhushialo, ne Nyasaye amwenyela enywe bio mwikulu. Ne Nyasaye niwa amani owamachesi muno.

Ne likhayanga okhuba likhuwa liaranjilila okhurula khu-Nyasaye, Toto mwakhanyoolele eshinyasio eshikhongo khukamwabukula ako.

Kho mulie khubiamwanyoola muliyiie, nibiabwene okhulibwa, ne murie Nyasaye toto Nyasaye ni omunji wobulesheli omunji wetsimbabaasi.

Ewe Omurumwa boolela abamwatila bali mumikhono chienyu mbu; Nyasaye nalola obulayi bwosibwosi mumioyo chienyu alabahelesia ebilayi muno okhushila bilia abiabukulwa khwinywe ne yetsa okhubaleshela. Nyasaye no munji wobulesheli owetsimbabaasi.

Ne nibeenya okhukholela obulianga(okhukatia) bamala okhukholela Nyasaye inyuma eyo, mana Nyasaye nabashila. Ne Nyasaye ni omumanyi muno owamachesi po.

Toto balia basubila mana nibawuya mana nibalwanila idini nende omwandu kwabu nende emioyo chiabu khunjila ya Nyasaye, nende balia bahelesia(muhajirina) eshimenyo mana nibahabina(idini), abo nibo abetsa abene khubene. Ne balia basubila mana nibalawuya enywe mubula omunwa kwokhubachelama shiosi shiosi okhuula bawuye, ne nibenya halali mubahabine mudini mubahabine, halali khubandu balia abamulinabo indakano. Ne Nyasaye alolanga kamukholanga.

Balia abakhaya ni abeetsa abeene khubeene, ne nimulakhola murio tawe, kalaba amatemo khushialo nende obutobela obunji.

Ne balia abasuubila mana nibawuya, mana nibalwana khunjila ya Nyasaye, nebalia bahelesia muhajrina eshimenyo, nibahabina, abo nibo abasubili batoto, bali nende obulesheli nende omukabo omulayi.

Ne balia abasuubila(okhurula owo) mana nibawuya mana nibalwana halala ninanyu, abo bali ninanyu, Ne abananda bakhoyekhananga okhuritsana abene khubene, Toto Nyasaye ni omumanyi wabuli eshindu.