Al-Ahqaf

Ha mim.

Ukhwishibwa kheshitabu khurula khu Nyasaye owa Amani Omuchesi muno.

Ni shikwaloonga likulu nende eshialo nende biosi bili hakari wabio halali khubwatoto nende ebise barebwaho, Nebalia bakhaya shibabukulilanga oluchenda mukabekanyilisibungwa tawe.

Boola mbu: “mulolangakhwo biamulamanga bilali Nyasaye, munzechesie nishina shabialonga shili khushialo, nohomba bali nende obulala khu walonga likulu, mundererekhwo eshitabu ashialiho imbeli wa shino, nohomba eshimanyisio shiosi shiosi shiobumanyi nikalimbu muboolanga obwatoto”

Ni omukori omukhongo uli arie, ushilakhwo ulamaanga, abalali Nyasaye, ebalalibafuchilila ukhula inyanga yeyindukho, nabo bakorerwe amalaamo kabu.

Olwa Abandu balikhung’asibwa baliba abasuku khubo, ne belikaana okhulamwa khwabu.

Ne nibasomelwa tsinyaali tsiefu ethili habulafu, abakhayi baboolanga nibakhalola abwatoto mbu: “ buno ni obulosi bwahabulafu”

Nohomba baboolanga mbu: “yekasiliasa omwene” , boola mbu: “ nikali mbu ndekasilia omwene, enywe shimulikhoonyakhwo shosi shosi imbeli wa Nyasaye tawe, ye amanyile muno kamutiabukhanga, ye niye omuloli hakari wanje ninanyu naye ni omunji wobulilesheli omukoosia muno.”

Boola esie shendi omwishemuli mu Barumwa tawe, ne engorwa ngalandilikholwa nahomba enywe, Enondanga butswa kefimbulilungwa mubufimbuli, Ne shendi shiosi shiosi tawe halali omwikanyilisi wa habulafu.

Boola: “mulola murie nikali mbu kano karula khu Nyasaye mana mukakhaye mana abeho omuloli okhurula mu Baana ba Isaraeli, shinga kano, mana asuubile nanyu mukhaye,” Toto Nyasaye shalunjisinjia betsimbi tawe.

Ne abakhayi baboolela basuubila mbu “kabetsanga kano mbu namalayi shibakha khuranjilile tawe” ne olwabakhaya okhulunjikha baboola mbu : “buno ni obuleyi bwakhale.”

Ne imbeli wuwe shaliho eshitabu shia Musa, Shiobulunjifu nende tsimbabaasi, neshino ne eshitabu shitinyisia sho lulimi olwarabu, kho shikanyilisie abetsimbi ne shibasuubisie abakholi bamalayi.

Toto balia baboola mbu: “ Nyasaye wefu omulesi ni Allah..(Nyasaye) “ mana nibaba abalunjifu, shibaliba nobuyendi nohomba shibalibeelela tawe.”

Abo nibo abandu bomwikulu, balimenyamwo tsinyanga tsiosi, Omurungo khukabakholanga.

Khwachelela omundu okholele abebusi bebe babili amalayi, Nyina Mwana yamuchinga munda khukhusanda ne namwibula khukhunyakhana, okhumuchinga munda nende okhumuleshesia okhununa ni emiesi amakhumi kataru, okhula ngala yola omundu omukhongo mana niyola emika amakhumi kane, naboola mbu: “Nyasaye wanje omulesi Nyalile enyoole okhupa orio khutsimbaabasi tsitsio tsiawambelesia nende khu abebusibanje ne ekhole amalayi kakhuchamisia, ne ungasilie olwibulo lwanje, esie ndikanile khwiwe, ne esie toto endi mubasalamu.”

Abo nibo bakhuchamilanga abikhole biabu biabakholanga,ne khubaleshela tsimbi tsiabu ne baliba mu bandu bomwikulu, indache yatoto yabalakungwa.

Ne ulia wikhandila abebusi bebe babili , nababolela mbu : “murisinjia mbu ndililamusibwa ne lwabura olwibulo olunji neshili okhubaho,” ne abebusi abo basabanga obukhoonyi khuNyasaye nibaboola mbu: “ abaane ewe subila toto indache ya Nyasaye niyatoto” naye aboola mbu: “ni shinashino? Athisikhali butswa tsingano tsiabakhale.”

Abo nibo bamakhuwa kabu kabusibwa mubandu babura imbeli wabu mumajini nende abandu, Toto abo banyoola okhusikha.

Ne boosi baliba nende ebichelo bikabukhane khukabakhola, kho abarunje ebikhole biabu nabo shibalikholelwa obubii tawe.

Ne inyanga yabakhayi balirerwa mumulilo, baliboolelwa mbu: “mwamala okhubukula ebilayi bienyu khubulamu bwokhushialo, mana nimubwikhoyela, kho lelo luno murungwa eshinyasio shetsisoni khulwa okhufura khwenyu khushialo khunjila ilali yatoto, Nende khulwa amabii kenyu kamwakholanga.”

Ne itsulila omusiani wababu A’d, olwa yekanyilisia abandu be khumatulo koluyeshe, ne toto abekanyilisi abanji babura imbeli nende inyuma wuwe, nibaboola mbu: “Mulalaama shiosi shiosi tawe halali Nyasaye, esie abalolela eshisa eshinyasio shieinyanga ikhongo.”

Baboola mbu: “witsile okhukhukabukhasia nende abanyasaye befu, mana khurerere kokhulakanga ako noli mubalia baboolanga obwatoto.”

Yaboola mbu: “Toto abumanyi bweinyanga eyo buli khu Nyasaye ne eboosilinjia butswa kendumilwe, halali esie abalolanga mbu mukholanga obusilu.

Olwa balola lileesi niliitsila abamenya, baboola mbu: “lileesi lino nilio okhukwisilia ifula?”khane nikalali kario tawe, halali kano nikamwenyelenge omuyeka kulimwo eshinyasio eshilulu.

kusishia buli eshindu khubunyali bwa Nyasaye wakwo omulesi, mana nibiba mbu shibakhalolekhana tawe halali tsinzu tsiabu butswa, Endio nelwakhurunganga abandu betsimbi.

Netoto khwabamenyiamwo obulayi, shibili shinga khwabamenyia enywe tawe, mana nikhubahelesia amarwi nende tsimoni nende emioyo , mana amarwi kabu nohomba tsimoni tsiabu nohomba emioyo chiabu shichiabakhonyakhwo shiosi shosi tawe, shichila bo bakhayanga ebimanyisio bia Nyasaye mana okhukatsula khwabu nikhubabotokhana.

Ne toto khwasishia tsingongo tsisubilana ninanyu, nekhwatsirumila ebimanyisio bakhaba bario banyoola okhukalukha.

Ne shichila shila balia ababalaamanga abalali Nyasaye nibakhaya okhubahabina? Halali babakorakhwo, ne obo nibo obubeyi bwa bachikhanga.

Ne olwakhwarera omukanda kwa majini ukhwitsa khwiwe okhuwulilisia Ikurani, Olwayasoomwa baboola mbu : “ulilisie.” Olwa yamala okhusoomwa, bakalushila abashiabwe okhubekanyilisia.

Babola enye bashefwe, efwe khuwulile eshitabu shiarumwa inyuma wa Musa shifuchilsania nende kalia kaliho imbeli wuwe, ne shilunjisinjia khubwatoto nende khunjila ingololofu.

Enywe bashiefwe , fuchililile omulanji wa Nyasaye , ne mumusuubile (Nyasaye) alabaleshela tsimbi tsienyu, ne alabekalila eshinyasio eshilulu.

Ne ulafuchilila omulanji wa Nyasaye, shibalishila khushialo tawe ne shibaliba nende abalibaliinda imbeli wuwe tawe, abo bali mubukori obwa habulafu.

Koo shibalolanga mbu toto Nyasaye owalonga likulu nende eshialo, ne shiyachong’a okhubilonga tawe mbu ni omunyali wokhulamusia abafu, nendio mbu yetoto nomunyali wabuli eshindu.

Inyanga yabakhayi balirerwa khumulilo, mana barebwe mbu: “Kano shi kali katoto?” baliboola mbu: “Nitoto Nyasaye wefu omulesi.” Baliboolelwa mbu: “mana mupile eshinyasio khulwa okhukhaya khwenyu khwamwakhayanga.”

Kho wifwile shinga befwila Abarumwa bokhwifwila okhukhongo, ne olabayungubasilia tawe, toto inyanga yabalilola kabalakwa iliba shinga shibamenyekhwo khushialo halali lisaa lilala butwsa khushitere. Ngako kaboolele, ne shibasishibwa tawe halali abandu ababii.